2017年12月27日 星期三

【週末郊遊8】T-Park [源·區]導賞遊



【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]



(2017.5) 一家大細、老少咸宜、有教育性、環境舒適、有瓦遮頭...... T-Park,係我嘅心水推介。老實講,未去之前,我根本唔識T-Park係乜。去完之後,覺得好有意思,仲有種充滿正能量嘅感覺。

T-Park,係一個污泥處理廠,亦係一個由零開始建造嘅科技園區,以「轉廢為能」為目標,處理污泥嘅同時將廢物變成可發電嘅再生能源。園區內亦配有海水化淡科技,所有T-Park園內嘅水包括飲用水同水療浴池、淋花灌溉都可以做到自給自足,貫徹循環再生嘅環保概念。

T-Parkby appointment嘅,必須先喺網站約時間。可以預約spa同導賞,我哋去嘅當日係母親節,水療設施已滿,所以只約到導賞團。
T-Park嘅途中,經過一大片滿載大石嘅山頭,好特別嘅地勢。後來上網查究先發現原來「屯門石山」的確係天然石塊奇境。
到步前經過嘅路都幾污糟,如果揸車要有心理準備之後要去洗車。另外,亦可以由V City坐接駁車入園。
T-Park門囗都幾靚架,今日停咗部「敢探號」,仲放咗條大蛇。
入去先登記。然後,導賞團開始前會先播一套關於T-Park嘅短片。
出嚟就係好舒適嘅cafe,提供輕食,仲利用咗當年皇后碼頭嘅一木柱設計成新穎家俱。
污泥焚化同廢氣嘅處理。T-Park嘅海水化淡科技,足夠令園區自給自足。
大型焚化爐及其風扇嘅螺旋槳。
焚化過後淨餘需要運去堆田區嘅垃圾。

T-Park已在使用中,而且可以處理全香港所排出嘅污泥,仲有多餘空間。而生產出嚟嘅電力,供應園區之外,就會轉駁到各大電網。

最後一站係T-Sky,一個位於高樓層嘅觀景休息區。
依度放咗好多利用舊物造成嘅家俱。
牆上貼滿五彩繽紛嘅便條
哥哥同佬佬都各自寫咗留言。
臨走嘅時候,水池有燈光,好靚!

個人認為T-Park好適合一家大細又或者學校團體參觀。又因為當中都比較具知識性,如果小學高年級嘅小朋友就更好。現代人如廁方便,一按手制之間污穢嘅東西就湮消雲散,小朋友或年青人好難意識到,背後藏住幾多人力物力。

廢物處理係每個社會都要面對嘅重要課題,無論係針對污水、污泥、垃圾嘅設施,都代表住一個真正進步嘅城市。其實香港喺環保事業同配套上仍然好落後,若能夠多投放資源,發展空間無限。正所謂排水道係城市良心,好多時候,真正長遠造福市民嘅大型工程,往往係肉眼唔容易見到嘅。

2017年12月16日 星期六

【週末郊遊7】饒宗頤文化館



【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]



(2017.5) 依篇嚴格嚟講唔可以叫週末郊遊,因為饒宗頤文化館就喺市區,從美孚地鐵站徒步而上唔駛十五分鐘。美孚係我細個嘅家,充滿童年回憶。適逢婆婆生日,天氣又開始熱唔想再行山住,加上婆婆係文化人,一於行吓以國學大師饒宗頤命名嘅饒宗頤文化館啦。
 
如果由美孚地鐵站B出口,直接向荔枝角方向行最快。
沿住曼克頓山對面嘅天橋,經過青山道休憩處就到了。
講到饒宗頤文化館,歷史都可謂非常悠久,從十九世紀開始,依度曾經係英國聘華工開礦嘅屯舍,即係俗稱「賣豬仔」嘅「豬仔館」。後來又先後成為檢疫站、荔枝角監獄、荔枝角傳染病院。2000年後曾經經營長期護理院,後來關閉並由政府接手。

感覺真係有啲悲情,所以政府唔再用嚟做醫院疫站,改為以活化歷史為主題嘅文化館,比返啲正能量佢,都算唔錯。
第一個館係常設藝術館,介紹饒宗頤先生。
設計優雅,好有古典氣息。
 饒宗頤先生嘅成就,其實唔可以三言兩語盡錄。佢不但係國學大師、東方學家、藝術家,對書法、書畫、詩詞、古琴亦造詣極高。著作無數,亦獲獎無數。佢嘅研究領域除了歴史文化、宗教經典外,更係現今少有精通甲骨文及敦煌學嘅深學者。大嶼山昂坪嘅「心經簡林」就係出自饒宗頤先生手筆。
再上一層,環境幽靜,有一個好靚嘅荷花池。據說,饒宗頤作畫喜畫荷花,有「饒荷」之稱。
婆婆同Jobee影相影得好開心喎,仲見到可愛嘅小青蛙
另一關於百年香港嘅展館。
要再上第三層,可以搭𨋢我哋去嘅時候係社企銀杏館最後一個星期經營,好似依家已經開咗新嘅餐廳。
一棟棟建築入面係唔同嘅展覽,當日嘅主題係「活字生香」。
二十弱冠、三十而立、四十不惑、五十知命...?聽落好似有啲道理。
文字樹~一切文化嘅起源,好有意思。
關於漢字文化嘅展覽。
隨住科技進步,寫毛筆字已經唔需要墨,有水就得喇,而且會自動消失,同一張紙可以循環再用。
參觀咗咁耐,坐低休息一下先。
可愛嘅植物。
再往上行就係旅館「翠雅山房」,但我哋只係行一就離開啦!
好舒適嘅一個下午,喺依種環境好容易覺得自己個人都優雅咗幾分。
饒宗頤嘅國學,好遺憾地其實離現代人越來越遠。一路離開文化館,我心入面諗,今時今日談文化,似乎只有飲食文化、旅遊文化、衣著文化、聲色犬馬...... 但真正喜歡文字嘅人不知有幾個。

時下嘅文字運用已經越來越泛濫住虛張聲勢與歌功頌德,無論係充滿創造性嘅繁體字、或者曾經高尚優美嘅漢學,相信好快就會同我哋嘅下一代成為陌路人。

將心目中珍惜嘅文化留比小朋友,盡力而為啦...... 同時,為咗積極保存街頭文化,決定行去美孚拮串魚蛋先!😉