梨林物語: 【關西自由行】大阪、京都、和歌山5日4夜樂而忘返之旅

(2013.03) 一直從其他人嘅旅遊blog中大為受惠，諗諗下不如自己都開始寫遊記分享一下，又可以留低旅行嘅快樂回憶。前年同老公本來打算去關西，仲喺高峰期換咗唔少円，結果有咗BB去唔到。今年面試時節結束決定帶埋Jobee輕鬆一下（不過都要有100個乖印章先有得去！）
半年前想book4月1號回程已經滿咗，結果只有5日4夜行程。貪心嘅我決定去晒大阪、京都同和歌山。其實有啲趕，去少一個地方會好啲。

Day 1: HK-Osaka
正常嘅早機，到達關西國際機場約兩點半。今次下榻心齋橋嘅大阪日航酒店，有兩個辦法去：
1）坐airport shuttle出city，不過班次好疏。我哋到步時已經離開咗；
2）搭電梯上一層坐「南海電鐵」到難波站，再轉地鐵到心齋橋站。不過我哋上咗「急行」停咗好多個站，想快最好揀 "rapid-特急"。

Check point #1: Osaka Nikko Hotel
今次本來有啲後悔冇揀就喺正難波站上面嘅Swissotel，諗住近心齋橋好似方便啲。不過搭過車後又發現其實都好方便，只係第一日要推住行李轉吓車咁解。喺南海電鐵嘅難波站落車後，搵御堂筋線，搭兩個站就到心齋橋，而我哋住嘅日航酒店就喺正上面。

Settle down後，我哋決定行去心齋橋醫肚。原來過條大馬路就到啦！本來我想搵章魚燒先，不過兩仔爺一心想食三文魚子，見到依間壽司店嘅門面都ok，我哋決定搏一搏。
一入內發現佢哋一定做開遊客生意嘅，帶咗我哋上房，又比咗一大堆有圖嘅menu。初頭驚啲嘢唔得，不過食落都唔錯，幾新鮮，我仲以僅有嘅日文叫咗日文menu上嘅野菜Tempura，好味！

本來諗住依餐只係下午茶，但食完再周圍行下已經天黑了。由於我同老公對潮流與扮靚冇乜興趣(其實我都扮靚嘅，不過多數online shopping搞掂！）。於是我哋走咗去睇食物，超市同便利店都睇一餐！

買咗啲戰利品返酒店，但士多啤梨都唔平，而且冇想像中甜...
到九點幾，平時Jobee要瞓架啦，但大家又有啲餓，於是去咗食宵夜。
酒店附近有居酒屋，但今次老公話不如試下間小酒吧，坐落叫咗六款tapas同一個pizza，又幾好味喎！所以Day1可以話只係食、食、食...

Day 2: Osaka

Check point #2: 大阪天皇寺動物園
Day 2 嘅第一站係動物園。本來我想去拉麵博物館（http://www.nissin-noodles.com/pamphlet_j.pdf），但Jobee揀咗動物園(http://www.jazga.or.jp/tennoji/)，因為佢冇見過北極熊。可惜，今日有少少落雨。由心齋橋去天皇寺動物園站唔駛轉車，可以沿御堂筋線搭到動物園前站。

天皇寺動物園唔算熱門景點，因為佢都算係一個鬧市中嘅老牌建設。好奇查一查，動物園於1915年正式開園。1915？有冇睇錯？真係喎！原來動物國有百年歷史，經歷過戰爭嘅洗禮，再不斷翻新並加入新館。知道佢歷史咁悠久後，不禁好尊重日本人依種重視保育嘅態度，我哋喺鬧巿中嘅荔園老早就起咗樓啦！

入到動物園，雖然舊舊哋，但係好大，而且有好多連爸爸同媽咪都未見過嘅動物...
個雀鳥館令我好impressed！因為睇得出佢唔係新建築但依然好有睇頭！仲有深夜動物館、非洲/澳洲動物、等等……

天公不造美，行行下開始落雨，好彩都有傘同埋唔算好大。動物園有兩邊出口，我本來喺御堂筋線嘅動物園前站入嚟，走時行咗去JR線嘅天王寺站，本來我想坐車去鶴橋站食大阪燒（Okonomiyaki），但發現依度有間shop都有得食，所以決定試試！

食完之後行下商場都有啲幾得意嘅發現！

Check point #3: 大阪城公園

下一個景點係大阪城公園，一樣係沿JR線由天皇寺站坐到大阪城公園落車就得啦，今日嘅行程都可算係好順路！到大阪城仍然有小小雨，但天氣好舒服。其實依個景點對小朋友嚟講可能係沈悶咗啲，我地從落車一直要行約20分鐘，但Jobee雖然行得幾辛苦都有堅持落去。

一向怕悶嘅爸爸今日好有興趣，佢一邊行一邊硏究歷史，原來佢以前有睇過關於豐臣秀吉嘅小說！大阪城有四百幾年歷史，係中世紀統一日本嘅武士豐臣秀吉於1583年始建嘅。秀吉死後，全日本爆發大戰，由德川家康取勝並佔了大阪城並多次徵收民款加建，而德川家族嘅幕府政權則定都於江戶。多年來大阪城雖然有受損但都不斷有大規模清洗同整修，所以亦不失當年嘅華麗！

返到酒店休息過後，我哋決定去試上次老友介紹距離酒店好近嘅燒肉店。點知，Jobee居然行行下瞓著咗！搞到爸爸到步後都要抱住佢！餐廳有好多小套房。我哋後悔叫咗套餐，因為有啲部位唔鍾意食，如果再嚟會散叫。

Day 3: Kyoto
雖然我成日叫爸爸早啲起身，但自己都唔好得去邊，醒咗時己經九點啦！
今日要搭車去京都，要快手啲啦！一出房門發現個喼嘅「碌」爛咗，唉，佢都咁大年紀囉，用咗成十年啦，唔怪佢。點知，爸爸將個爆咗嘅碌邊搣咗，內碌仍然可以用！勁！所以我哋一向好鍾意Samsonite，雖然佢唔係超名牌，但quality 同design 都好好！

言歸正傳，從大阪去京都好方便，而且有好多辦法。我哋照舊坐御堂筋線至梅田，行大約5分鐘至JR大阪站。之前搵返嚟嘅資料有3種車可以搭：
1）JR東海道本線快速往野洲方向，經3站到京都，29分鐘，540円；
2）JR特級雷鳥號經2站到京都，1680円；
3）JR東海道本線往京都方向，經1站到新大阪，轉搭JR新龫線往京都，23分鐘，2930円。

一到站頭問人，好自然個個都會指你去搭第一種方法，因為冇人會為幾分鐘比多二千幾円。我哋買咗票後為咗確保唔會搵錯月台，入閘後再問咗車站職員。注意上到月台班次雖然好多，搭快車會好啲。因為我哋為咗買早餐冇上到本來嘅列車，問檔口個姨姨可唔可以就搭下一班，喺我水皮嘅日文下明白下一班要停多幾個站，所以寧願再遲一班上車反而會早啲到京都。

到歩後，京都個站好大。因為聽朝會攞車，我book咗喺正租車公司旁邊嘅New Miyako，但經過站上面嘅Granvia Hotel，又好後悔，真係超方便，下次要住依間先得！
其實又後悔得一日喺京都，咁多地方想去，點算！Check-in後，我哋決定先去嵐山。

Check point #4: 嵯峨嵐山
由京都站搵山陰本線直接有車到嵯峨嵐山：

1）如果想坐嵯峨小火車的話，就要搭普通車，唔可以搭快車，可坐到馬堀站落車，跟住指示步行至小火車龜岡站買車票。列車會經過保津川，大部份人會喺竹林落車，亦可坐到嵐山站落車；
2）如果時間唔多，好似我哋咁，最好直接坐快速到嵯峨嵐山站。車程約15分鐘。

到步後沿住小馬路行約5-10分鐘就到達中心地帶，條路基本上都好好行。我哋一到步就搵嘢食，本來我想食豆腐（皮）料理，但見到嘅餐廳排長龍，最後都係比爸爸依隻食肉獸拉咗去食定食。

午膳完畢，一出門就見到天龍寺，於是行咗入去。雖然都幾多人，但氣氛安靜舒泰。

行到盡頭就到咗竹林，不過今日都幾多人，竹林冇咗我想像中超脫嘅感覺。朋友話新八茶屋附近有親子單車租，所以我哋就一正步行至渡月橋方向。其實如果一早租都可以用單車嚟到竹林，不過因為我自己咁大個人都唔識踩單車，所以就由爸爸帶Jobee兜風。

賞景期間，發現好多人喺湖上划船，剛剛爸爸又載住Jobee經過，於是我哋又放低部單車去划船。天氣好舒服，好relax呀！

玩完都快4點啦，本來想行耐啲，不過又想貪心去埋清水寺，所以都係走先啦！
行過又食個軟雪糕先！今次媽咪要櫻花味，Jobee揀咗綠茶味。一邊食仲見到有豆腐味，不過食唔落咁多啦！

返到京都站大約5點，喺站外大門口坐100號巴士可以到清水寺。不過，可能近黃昏嘅關係，等咗好耐都冇車。大大話話都企咗接近15-20分鐘，上到車後又非常塞車，結果已經天黑了。加上Jobee又喺車上瞓著咗，我哋決定喺八板神舍落車，再搵下嘢食。

本來見到旅遊書介紹一間精緻嘅豆腐料理店，點知冇咗？！食肉獸爸爸仲開心，走咗去食shabu shabu。晚飯後行咗一陣阺園附近嘅小街我嘅就返咗酒店。Jobee又好比心機寫travel journal！

Day 4: Wakayama
早餐過後，終於都到攞車時間，好開心呀！雖然我尋日覺得間酒店房有啲舊，但今日一出門口行兩步就到車行又冇後悔啦！今次喺Nippon-rent-a-car租車，貪佢好多分店，而且攞車同還車嘅地點都幾多。

上到車開始玩下個GPS，向和歌山進發！上咗車之後，我哋就覺得下次要揸多兩日車，因為一家人翱翔公路嘅感覺實在太好了。沿途櫻花遍野，賞心悦目。不過，toll road嘅費用又真係唔平，落和歌山個半鐘左右就比咗四、五次錢，加埋都幾千円。

Check point #5: 和歌山黑潮市場
我哋嘅第一個目的地，又係食，係和歌山黑潮市場！一入去就見到重點節目劏吞拿魚，人都幾多所以我哋睇咗一陣就行開咗去覓食啦！

Check point #6: 和歌山 Porto Europa主題公園
另一個嚟黑潮市場嘅原因，就係可以去埋佢旁邊嘅主題公園，比個機會Jobee玩下細佬仔嘢！個公園最出名嘅激流列車原來要7歲先玩得，不過Jobee一向細膽，啲小兒科嘢反而玩得好開心！

差唔多三點，今晚嘅溫泉酒店喺白浜，仲有四十五分鐘車程先到，我哋又再上路啦！

Check point #7: 白浜千畳敷
到步差唔多日落，入酒店前發現白浜其中一個名勝「千畳敷」原來就喺正酒店旁邊，於是我哋就決定停吓到此一遊啦！顧名思義，千畳敷好似層層疊咁，係長年累月受海浪沖擊所形成嘅大岩盤。日落時份望落去，都幾壯觀架！

Check point #8: 和歌山海舟溫泉酒店
留咗五分鐘千畳敷，事不宜遲，我哋要去check-in啦，唔好浪費咗浸溫泉嘅時間。去到酒店門口，感覺就己經好靜好舒服。等待嘅地方有一排大玻璃窗，全個大堂都係tatami，好relax呀！

泡湯區除咗男、女分開嘅浴場外，仲有男女混浴（有毛巾提供）及三自私人浴池。外面有鎖匙，即係如果冇人，入到去可以自行鎖門，最長可以留一個鐘，私隱度高，又唔駛另外加錢book家族風呂，好適合我哋！

連浸咗兩個浴池，好熱！我哋喺休息位置食條雪條cool down吓。可能因為Jobee著住件浴袍成個和尚仔咁好得意，好多人都望住佢笑...

晚飯時間有兩輪，5點或8點，我哋揀咗後輪。酒店好細心，4／5點之間喺大堂有小食供應，9／10點又有宵夜拉麵。
我哋休息過後去咗食下午茶小食。嘩！居然好有驚喜！食物簡單有兩款，年糕串加甜醬，同煎韮菜餅。味道好好，Jobee食完仲想食，於是我哋要佢自己去問職員，佢都算聽話... 但係冇帶相機同電話，一張相都影唔到！依個喺一片落地玻璃同日落下嘅輕鬆舒服下午茶都幾值得回味架！

食飽飽後爸爸話要開車出去搵便利店買下嘢，於是我哋去附近買咗啲零食、啤酒、同Jobee最鍾意嘅果汁味牛奶。返嚟之後Jobee一邊飲心愛嘅士多啤梨味奶一邊寫travel journal. 我最鍾意佢依個專心樣！

到8點，晚飯時間終於到啦！有別於其他溫泉酒店，依度唔喺房間用餐，係喺餐廳內。本來有啲怕質數冇咁好，但原來都好精彩！

食飽飽我哋返房都仲喺露台浸咗一陣先瞓，今晚Jobee好夜瞓呀！

Day 5: Wakayama - Kansai airport
從軟柔柔榻榻米被窩中瞓醒嘅感覺：幸福。尋晚都未飽完，今日又另一餐豐富嘅早餐。

本來今朝我哋諗住再浸露天風呂，但居然落雨，Jobee好失落... 不過唔緊要，好彩嚟露台都可以再浸！

Check point #9: 和歌山 Energy Land
Check out 之後，我哋去咗一個叫Energy Land嘅小小主題公園。揀去依度因為同酒店好近，五分鐘車程就到，不過地方好細，冇想像中咁好玩，而且其中一個賣點錯視世界因為人太多我哋冇去到。

其實，白浜仲有好多值得玩嘅地方，如果有多一日就好啦！好似水族館、海灘、同有自然景色嘅景點。所以我決定留底以下資料以供日後參考：

和歌山黑潮市場	〒641-0014 和歌山市毛見1527番地	073-448-0011
和歌山城	〒640-8146 和歌山県和歌山市一番丁３	073-432-0001
白浜観光協会三段壁 / 円月島	〒649-2211 和歌山県西牟婁郡白浜町1600	0739-43-5511
三段壁洞窟		0739-42-4495
海中展望塔		0739-43-1100
景勝の宿浜千鳥の湯海舟	〒649-2211 和歌山県西牟婁郡白浜町1698-1	0739-82-2220
錯視世界 Energy Land	〒649-2211 和歌山県西牟婁郡白浜町3083番地(白良浜海水浴場前)	0739-43-2666
京都大学白浜水族館	〒649-2211 　和歌山県西牟婁郡白浜町459	0739-42-3515
白浜アール・ヌーヴォー美術館		0739-43-2565
Tore Tore Market	〒649-2201　和歌山県西牟婁郡白浜町堅田2521番地	0739-82-2615

另外，自駛遊前我覺得用以下websites做計劃都好好，可以約莫預計所需時間同車資。

Mapion	http://www.mapion.co.jp/ (可以查看詳細地圖)

Navi time	http://www.navitime.co.jp/ (可以輸入出發地同目的地電話，從而計算出所需公里數、時間及有料公路收費)