2018年6月1日 星期五

【小兒科行山入門6】河背水塘家樂徑



難度:1
時間:由河背村上水塘約半小時 + 繞水塘一週約45分鐘
長度:約1公里

2017.12)有靚景、有竹林、容易行,我認為河背水塘好適合初級行山者。今日我哋一行八大六小,行山再加埋除夕燒烤,可謂盡慶而歸。
首先約喺河背村鄉公所會合,依度有收費停車場。又或者坐元朗71號専線小巴亦可。
要先行一段路上山,約半個鐘頭,可以話係先苦後甜,因為條路有少少斜,居然見到條死蛇!
幾位男士(包括Jobee),幫手推BB車,證明條路幾咁適合親子!😆
上到半山,開始見到元朗風景,好開揚,令人心曠神怡。
經過依個露營地,轉右繼續往上行,然後會見到一個有機農場。
終於到達河背水塘!依度嘅好處係一嚟就先有靚景睇。
河背水塘嘅一大特點就中間嘅灌木小島,令綠色嘅樹木更有層次感。
望向水壩,景色都好靚。可能因為風景秀麗,大家有小小溜連忘返,唔覺意間就不停影相。
過咗長橋,就嚟到河背水塘家樂徑嘅正式起點。
山徑嘅路冇鋪石屎,鍾唔鍾意就見人見智,我個人覺得咁更有行山路feel,當然對鞋又會污糟啲......
小朋友輪住幫我揹背囊真係好喇!
小橋、流水、植物...... 有一個對住靚景嘅古墓,我哋唔好意思打搞。
到咗竹林,嘩,小朋友即刻變咗古代人,好似有武功上身咁舞力弄劍,拾起地下嘅竹嚟玩。
到今日Jobee仍然不時提起想去竹林,咁個感覺又真係幾舒服嘅。
過咗竹林繼續行,居然影到張靚相。
然後又比我哋發現咗個靚景位,大家都紛紛走落去望吓先。
由依個角度影湖面平靜如鏡,感覺超治癒!
大合照時間,小朋友同大朋友各一張!😆
再行一陣,爬吓石頭,又再次見到水塘景。
原來已經到尾聲了!我哋到咗家樂徑嘅出口,大家坐低休息吓。
然後又忍唔住再去水壩條橋欣賞吓美景。依幾位小朋友仍然未分高下。
再行返落河背村要半個鐘左右,如果由落車開始計,成個過程唔洗兩個鐘頭,好適合初級親子行山。
落山啦,Jobee將佢嘅綠竹寶劍收埋咗喺依度,話要下次返嚟搵返喎。
當晚去咗一間個名好靚,叫「海天一色」嘅燒烤場。雖然並冇海景,但仍然有除夕嘅夜空,哈哈!
食物唔錯!居然可以直踩五小時燒嘢食,我覺得大家真係好勁!
再見了2017

有咗小朋友之後,每一年都過得好快,我心入面明白,依種陪住孩子上山下海玩遊戲嘅時候其實唔係好長。然後,我又不斷提醒自己,孩子成長亦係自己成長。老土地講句,學會珍惜日子。幸福,好難得,但又可以好簡單。


2018年4月14日 星期六

【週末郊遊9】萬宜水庫東壩半日遊

【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]



2017.12)之前參加過一次地質公園海上遊,感覺好好,所以一直想試吓從陸路去地質公園。今次咁啱有同事去完萬宜水庫嘅東壩半日遊,介紹我去,於是即時上網報名。萬萬想唔到今次變咗個千辛萬苦之旅。
我哋就係報咗依個「東壩半日遊」。(https://www.volcanodiscoverycentre.hk/index.php?option=com_content&view=article&id=5&Itemid=118&lang=zh )
 是日週六,本來已經早成個鐘就開始入西貢,但今日嘅塞車情況好唔正常。因為無可避免會遲到,打電話到火山探知館,先知道原來今日西貢爆水管,好多條路封咗,所以早上嘅半日團都遲咗出發。
到入西貢前,又發現有車禍,怪不得條路塞到完全冇車郁。

去到火山探知館,我哋終於都係錯過咗旅遊巴。

唯有坐的士入去,但綠的大排長龍。一波三折,樂樂表哥仲暈車浪。入到東壩已經差不多四點,只有一個鐘頭多啲。
去到涼亭好多牛牛!
嘩!一見到堤壩後面一望無際嘅大海,又即時覺得千辛萬苦嚟到都係值得嘅......
沿途嘅六角柱石,係地質公園嘅地標,遠睇一排排好雄偉。
六角柱石(Hexagonal Rock Columns) 嘅形成,可以追溯到侏羅紀至白堊紀,當時西貢一帶有一座超級破火山口,而內𥚃所載著炙熱嘅岩漿同火山灰喺半熔融的狀況下融結,情況就好似一煲大滾嘅杰粥一樣。隨住熱力逐漸消失後,半熔融的岩漿慢慢冷凝收縮,形成六角網狀裂隙,再向底部延伸,最後切割成無數條石柱。六角柱石喺好多地方都有,但西貢嘅六角柱呈灰白色、屬酸性,與一般由溶岩冷卻而成嘅唔一樣,所以香港嘅地質公園其實好特別㗎!
一億四千萬年前嘅歷史遺跡,大自然嘅鬼斧神工。
行到海邊嘅堤壩,有一排長長嘅錨型石,舅父仲童心未泯走過去影相,然後樂樂表哥好乖咁扶返爸爸落嚟。大海...... 的確係好吸引嘅......
好喇,好奇嘅我又要查一查,到底點解堤壩嘅錨形大石係依個又似丅又似丁字嘅形狀嘅呢?原來,為咗減少波浪衝擊而受到侵蝕,防波堤嘅石頭形狀設計會盡量以最小嘅體積達到最大嘅表面面積。
喺東壩同外面嘅堤壩之間,有一個小湖,日落時分別有一番瀟瑟嘅氣氛。
幾個小朋友,玩掟石頭已經不亦樂乎,有時候快樂真係好簡單。
我嘅小男孩,點解好似忽然長大咗......
隙縫中嘅生命。

玩咗一陣,時候唔早啦,我哋再慢慢行返旅遊車。
海景與堤壩配合得好靚,廣闊無垠、一望無際,人就自然會感覺放鬆
連小朋友都會自動好心情!
返到集合點。據說,藍色嘅錨形大石係為咗紀念興建水庫時犧牲嘅工程人員而建嘅。
上到旅遊車,沿途見到好靚嘅日落景色。
離開時車上嘅導賞員問,有冇睇到「海蝕洞」同「S形石柱」......?噢,真係冇喎,唔通我哋miss咗去程嘅介紹?然後佢話,「噢咁就即係等於冇嚟過啦!」

嗯,咁我又唔同意喎...... 我明白,有啲嘢,大家覺得好有代表性,但何必為所有嘅旅程預設框架呢?我明明就係有嚟過,亦睇到我好欣賞嘅景色。千辛萬苦尋絶景之旅,有得著、亦有錯過,仍然係不枉此行。


部份資料來源: