2013年10月19日 星期六

【北京自由行】5日4夜尋根之旅





  | 自遊行 | 親子遊 | 遊記 | 旅遊bLink to 梨子總目錄

【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]


og


(2013.10) 幾個月前訂咗十月份去日本関東自駕遊,溫泉加紅葉加大自然及農莊之旅,興奮莫名。點知九月初忽然有一連串關於泄漏輻射嘅負面新聞(而且唔係年初嘅舊聞),最後喺蝕錢之下忍痛取消咗日本之行,喺輕井澤酒店網頁上click "cancel"前嘅一刻我對住個靚到一聲嘅湖景心情無奈......到底幾時先可以再去日本?

為咗彌補對舒適自駕與醉人美景嘅欲望,我哋居然揀咗去北京?令大部份朋友一聽就一地眼鏡。冇錯,因為老公好歷史武俠小說;小妹好歷史言情小說,而一年內北京就只有短短嘅910月天氣最好。「不到長城非好漢」,今次如果唔的起心肝上一次長城,過兩年仲帶住細仔就更難成行!

喺依度分享下如果有機會改期,最好同酒店直接訂房,又或者透過hotels.com。後者係我網上訂酒店嘅至愛,試過寫明non-refundablebookingrefund比我,而且態度超好!另外,我哋透過本地agent 訂嘅機票同兩晚酒店房就只退到三成左右。完成改行程及機票後先發現,原來回鄉証過晒期,可見真係好耐冇「回鄉」!結果我同Jobee喺出發前一日先以快証手續換好咗新嘅回鄉卡!

Day 1 -
故宮/建一公館晚飯
落機我哋已經約好咗朋友介紹嘅司機叔叔陳先生接機。佢比我哋嘅感覺好可靠,而且幾有heart!第一日係星期日,本來我怕人多打算今日去奧林匹克公園,但陳先生話可能會落雨,提議我哋先去故宮,因為離酒店近而且落起雨嚟可以避吓。


Check point #1:  北京万豪行政公寓 (Beijing Marriott Executive Apartments)
今次住王府井,喺北京市嘅一二三四環城市規劃內可謂中心嘅中心地區,離機場約45分鐘車程。 到酒店check-in後,我哋好心急睇下間房。
酒店房個bath tub好大,係今次揀住依度嘅主要原因。
Check point #2:  王府井小吃街 (Bad experience!!)
因為有少少餓,我哋打算去故宮前先醫醫肚。為咗食個快嘅,我哋走咗去旁邊嘅王府井小吃街,其中有一間鋪頭兩個後生仔店員極度熱情,但坐落我哋好快發現被騙,已經叫咗兩個麵、一客鍋貼,仲係咁介紹叫爆肚絲,加點後又再叫我哋試烤牛肉,我哋唔要佢仲係喋喋不休,但啲食物嚟到實在好難食,而且落咗單後就唔想再理我哋,激到爸爸好火!

王府井小吃街被騙後,去咗搭地鐵
Check point #3:  北京故宮
故宮就喺王府井旁邊唔係好遠,本來陳先生話我哋可以行路,不過為免再耽誤時間我哋決定搭一個站地鐵,到月台時問咗一位叔叔,佢態度好好,有北方大漢嘅熱情,叫我哋喺「天安門東站」落車。

落車後都幾多人,忽然諗起今日係星期日,去故宮唔知weekday 會唔會好啲? 到天安門前,遠望一片廣闊嘅天安門廣場,實在百感交雜、心情沉重。過咗天安門,要再過端門,先到入紫禁城嘅第一道正門:午門。已經三點有多啦,五點就關門,要快啦!

為咗令今次嘅故宮行程比較有趣,我事前對每一個宮殿都有略作硏究,再造咗啲圖卡比仔仔影相,希望令小朋友冇咁悶。

中和殿、乾清宮及坤寧宮


宮殿與宫殿之間嘅距離都算冇我想像中咁遠,但行吓停相,時間過得好快。喺中和殿前我聽到有一個遊客話以前內殿係開放嘅,但依家只有少少地方喺大門外供影相,大概係因為好多人手多多直接觸碰文物。

喺御花園我哋就見到一班內地團友經過石山時每個人都逐一用手「卒」一陣,我不禁好心痛,當年康熙行過嘅一磚一瓦、少女慈禧倚過嘅大石,所有珍貴嘅文化遺跡,今日可能日日都比啲大叔大嬸卒卒下......

四點半,我哋趕到皇極殿前想睇九龍壁,但原來已經冇得入!好失望呀!皇極殿同九龍壁都係建於乾隆年間,前者為作其退休居所(雖然之後都冇住),後者據說係紀念九王奪嫡事件。但明明仲有半個鐘頭先收館點解唔入得?我諗可能係好多遊客欠缺discipline,而且員工都趕收工所以故宮基本上係到四點半唔係official 嘅五點,值得注意。又或者,應該喺每一層門向左右都先睇完再深入行,例如養心殿同皇極殿喺兩則,好似我哋咁一路直入到御花園反而要走回想路。

御花園同宮外平靜如鏡嘅護城河。
喺故宮北門離開時向上望會見到景山公園,據說當年崇禎皇帝就喺山坡上遙望紫禁城自縊,今日諗起都感覺淒然。

後門好多司機會拉生意叫人去后海,但我哋一方面諗住時間唔夠;另一方面頭先根本食唔飽,所以一心想搵部的士去朝陽區嘅建一公館早啲食晩飯。嘩!原來好難!北京市一到五、六點好塞車,好多司機一見地址喺三環外立即拒載,後來幾經辛苦終於有部冇牌車答案載我哋,盛惠人民幣100大元。


Check point #4: 北京建一公館
到咗「建一公館」,已經差唔多天黑,依度同頭先嘅大街簡直兩個世界,好似入咗一個中式resort一樣,lobby有人彈古箏,而我哋就被安排入咗一間好大嘅房間用膳。
餐廳環境幾舒適同幾特別。食物味道都幾好,不過偏辣,而且唔平,埋單約五百蚊位

www.china-je.com
建一公館: 中國北京市朝阳区红领巾公园西园 (+86 10 5139 8739)


晩飯後返到酒店,到咗Jobee最鍾意嘅活動:浸浴!

將飛機兒童餐條魚放入浴帽內都玩一餐!

Day 2 - 意大利農場/頤和園
 
Check point #5:  意大利農莊 (http://www.agrilandia.cn)
今日嘅行程又大改動了!本來諗住去長城,但陳先生話天色唔好太浪費,所以我哋將原來第四日嘅農莊採摘之旅放咗第二日。北京有好多果園,但我硏究過網址,依個意大利農莊算係比較靚仔嘅。今日同陳先生包車,從王府井開車到順義區要一個鐘頭左右。

一星期前我打電話嚟佢哋話仲有蘋果摘,點知今日居然已經全部摘完!又失望了!順帶一提我見過Trip Advisor有人話農莊職員態度唔好。我個人感覺係,喺中國大陸旅行冇乜邊度有服務性行業嘅人態度特別好,所以農莊職員其實都唔太差。只係佢哋唔會太細心,指咗個方向叫我哋可以去大棚攞啲菜餵動物,但點攞法又講唔清楚到個棚度只有兩個村姑,好彩又有一個好鐘意Jobee所以幫我哋搵菜。
好彩都有少少動物餵吓,但坐成個鐘車就有啲無謂!
農場外觀唔錯,本來打算喺依度食lunch,但都係決定轉移陣地。
Check point #6: 頤和園安縵酒店 (環境靚但食物一般...)

 由於冇採摘所以時間尚早,我哋決定去頤和園旁嘅安縵酒店食飯,再入園遊覽。中餐廳古色古香,但食物就同香港點心冇乜分別。

Check point #7: 北京頤和園
入頤和園發現原來大明鼎鼎嘅Rubber Duck嚟咗北京,好興奮呀!點知,今日鴨鴨倒下來了,又冇得睇!依兩日好似運勢認真麻麻!頤和園真係好大,我哋沿住昆明湖行,好多人。無論喺故宮定係頣和園,我都覺得政府冇花心思去保育同修葺。好多宮殿或木刻本來好精緻,但已經好陳舊,咁珍貴嘅古蹟如果喺外國一定修飾保護得好好,但中國人嘅文明保養意識可謂叫歷史學家咋舌!

昆明湖上我哋見到一隻小鴨,Jobee正興奮間,旁邊一個大叔突然「強~~」一聲,一枝飛劍吐到湖中,原來佢想「喂魚」!果真引來一群小魚,實在嘔心到難以形容! 我馬上拉住Jobee趕快去到另一邊湖上搭船。

船上十分大風,比岸上凍好多!爸爸話吹到頭暈,但可以去到另一邊比較少人嘅地方,都係忍下啦!
船上望用湖邊嘅建築物好宏偉落船後沿住湖邊走我哋終於見到泄咗氣嘅Rubber Duck,仲見到有人喺橋上放風箏,好靚呀!

閒遊昆明湖邊,突然Jobee一語驚人:「我作咗首五言詩!」
咁勁!哈哈原來湖光山色可以令小朋友都有神來之筆,我哋當然叫佢即席揮毫。

風望>
上望去天空
陰山過河了
小草長大了
小雀飛過河

雖然好好笑,但六歲人仔都算諗到有啲意景,我同爸爸當然收貨! 行到五點幾,好攰啦,陳先生送咗我哋返酒店休息。到酒店後,Jobee又有另一首七言詩新作:

<小鳥飛>
一隻一隻小鳥飛
飛過一個大樹林
再飛再去大西洋
再去再去太平洋

到晚飯時間,今晚我諗住王府井附近應該好多店鋪,所以冇特別book。但一到七點幾,本來想入東來順已經完全爆滿。最慘就係個胃又有啲準備好食火鍋,最後只好喺「新東方天地」一間火鍋小店坐底咗,但依度出奇地價性比極高,羊肉唔羶連我都鍾意食!

試咗一啖冰糖葫蘆,Jobee即刻話好酸唔鍾意,不過我反而好享受依種酸酸甜甜嘅味道。其實可能係心理作用,我記得以前一本我好鍾意嘅書「城南舊事」入面有提過冰糖葫蘆,所以一路想試下新鮮山楂加冰糖嘅感覺,今日總算還咗心願。

Day 3 - Temple Restaurant
/科學技術館/奧林匹克公園
由於行程改動關系,第三日諗落朝早太hea令下晏太急,下次有待改進。今日陳先生部車不能行走(因為北京市太塞車所以同一車牌一週有一日不能入市區),所以佢建議我哋搭地鐵去奧林匹克公園及博物館。我一早book咗間由古廟改建成餐廳嘅法國菜 - Temple Restaurant Beijing (TRB),所以決定留喺酒店至午飯時間。
早餐後,去個兒童Playroom玩咗一陣,之後又去咗玩泡茶可惜酒店嘅茶軒好似唔係好正宗,冇台灣泡茶成套程序有埋聞香杯咁完整。
Check point #8: The Temple Restaurant Beijing (www.trb-cn.com) 好味道! Lunch抵食, 約二百蚊位!
飲咗茶又太飽,結果的士搵路又拖咗一陣。間餐廳喺一個舊胡同嘅盡頭,都幾難搵。


Check point #9:  北京科學技術館 (親子好去處!)

午飯後問一問職員,原來去奧林匹克附近要30-40分鐘,本來想去嘅動物博物館賣飛只係賣到三點半,所以我哋轉咗去「科學技術館」。

原來當日係單車比賽,的士停唔到場內街,好彩比我哋搵到部「黑摩的」,即係電單車加個殼,收10蚊車我哋到目的地

Check point #10:  北京奧林匹克公園 (親子好去處!)

 玩咗一個鐘頭左右,我哋諗住去奧林匹克公園。一出街口又有「黑摩的」10蚊送我哋去。今次剛剛趕得切係小賣部收工前買到3蚊包魚糧餵魚。湖內嘅魚食得好踴躍,Jobee同爸爸都餵得好開心。眼見橙色嘅魚、深藍嘅湖水、黃綠色嘅樹林、淺藍色嘅天空,個畫面真係靚到不得了,我忽然又覺得冇咗日本之旅都唔係咁可惜。
奧林匹克公園用三蚊人民幣買嚟嘅快樂時光。
奧林匹克公園橫跨兩個地鐵站,大得好利害。我本來想去睇花田,但由於四點後遊覽車已停(其實就算四點前因為員工趕收工,都會話已經冇車),而花田喺北園太遠,所以我哋只好留係南園。
門口有少少薰衣草,扮住花田先啦!
 
到五點幾,差唔多係時間返酒店。公園入口就喺「森林公園南門」,所以我哋決定搭地鐵返酒店。奧運公園及體育中心附近嘅站都好新好靚。
入站後見到個站又新又少人,以為搭地鐡都好好,點知一轉線後就出事了!可能正係收工時間,人越嚟越多,個個爭先恐後。尋日陳先生寫咗張紙比我,由森林公園我哋要先到北土城;轉車搭至惠新西街南口;再轉至東單,搭至王府井。中途到東單中轉站時,可能有一段路裝修,令到人群被迫喺一個好窄嘅樽頸位前進,段樓梯足足行咗成五分鐘迫到幾乎透唔到氣!

到月台時,爸爸剛剛講緊點解啲人唔等人落咗車先上,唔通怕自己上唔到車咩?點知話口未完,車門已經要關啦,原來真係得好短時間開門!當時爸爸已經入咗車,Jobee入咗一半,我仲喺車外,爸爸二話不說「啪」一聲勁力拍開度門等我入咗後即刻攬住我同Jobee,嘩!爸爸真係好 "Man",如果生於古代佢可能係武林高手!

事後我覺得爸爸分析得好啱,北京地鐵普遍設計失誤。港鐵每個站都有四、五條電梯由月台上地面,但依度只有兩條,唔足夠應付人流,所以個個一落車就好緊張。而停站時開門時間亦太短,所以冇人可以等所有人落車再上車。其實,邊個會想日日連搭地鐡都好似打仗咁,不過設計機構可能根本唔關心人民嘅基本需要,所以市民只好日復日同公共交通搏鬥。


Check point #11: 大董烤鴨
帶住一份百感交雜嘅心情,我哋返到舒適嘅酒店房。因為好攰,我將本來七點喺「大董烤鴨」嘅Booking改為八點,個接線員工答得好爽,到步後我明白原來話就話比人訂枱,其實根本要等。我追問嘅頭幾次個姐姐支支唔唔正眼都冇望過我,後來我態度強硬再問到底訂咗枱同冇訂有咩分別,佢又馬上比咗張枱我,唔通真係要靠惡?唉~~

大董嘅菜式其實設計幾靚、味道ok而且唔貴,所以好生意係有原因嘅。亦可能因此佢哋唔需要sell服務。如果有機會,我唔介意再嚟,但就會訂早啲,例如六點開始食可能就唔使激氣。


店內裝潢幾潮,菜式都好新穎。烤鴨皮脆而且冇肥肉可惜可能時候唔早,有幾種我哋想叫嘅菜都已經冇晒!

Day 4 - 長城/採摘/大宅門晚飯表演
 
Check point #12:  慕田峪長城
最後一個full day,亦係天氣最好嘅一日,終於等到最祈待嘅壓軸好戲:上長城了!好彩之前朋友提我哋千祈唔好去八達嶺睇「人肉長城」,今次我哋嘅目的地改為喺懷柔區嘅慕田峪長城
到步前惡補歷史慕田峪長城段建於明朝,西接居庸關,為開國大元帥徐達指揮所建。之後名將戚繼光率軍進行整修,遺存至今。

終於到啦!有人選擇行上山,但我哋就揀咗䌫車。每人來回80人民幣都唔平,所以好少人搭。

長城留影... 壯觀、宏偉、與歷史近距離交心... 念天地之悠悠... 感覺非筆墨所能言喻。

層層疊疊嘅崇山峻嶺,壯麗無比。
夠了!同志們!請勿再破壞古蹟!


行完長城後,我哋食咗個Subway再上路。陳先生提議既然星期一摘唔到萍果,依家可以去搵下沿途嘅果園。果然有一間果園不但有萍果,仲有桃同梨可以摘!



今次依個果園雖然冇意大利農莊咁靚,但簡陋嘅設施下都自稱冇用農薬,而且果實纍纍,Jobee摘到不亦樂乎!


果園玩咗一陣後要回程啦!不過因為仲有時間,而今晚食飯嘅餐廳又喺奧林匹克森林公園附近,我好想再去一次搵下之前見唔到嘅花田!今次停嘅門口較北,我哋行15分鐘左右就到花田,好可惜好多菊花已經謝晒,我始終見唔到心目中念念不忘嘅「波斯菊」!

森林公園處處都有靚景,雖然見唔到波斯菊,但依種不知名嘅紫色小花都唔錯!




Check point #13: 北京大宅門餐廳 (www.bjdzm.com)
到差唔多天黑,陳先生送我哋到晚飯嘅地方,仲買埋兩支青島比爸爸啤一啤!今次北京之旅就劃上句號了

夜晚大宅門有show睇,包括有雜技、變臉、功夫、中國舞等。都幾得意架!

Day 5 - 回程

早餐時我哋同爸爸唱生日歌。Jobee臨上機前一刻又帶住離愁......


今次嘅「尋根之旅」我見到壯觀而美麗嘅北京景色,終於明白中國人的的確確擁有錦繡山河可惜人民同時又長期背負住沈重嘅歷史以及極權下嘅生活壓力,以至行為及個性不經意地被扭曲。同陳先生嘅相處令我回憶起北方人嘅豪爽,包括以前曾經認識或共事嘅北京前輩。所以我仍然願意相信,大部份北京人都係熱血嘅,只係人性之所致衣食足然後知禮儀

可能短期內都唔會再踏足中國大陸啦,但心底我又真係希望以後帶細仔再嚟。長城仲有好多段,例如水關長城同「長城下的公社」;故宮仲有好幾個宮我想睇;仲有附近嘅王府、後海嘅胡同、圓明園遺址等。

身處香港依個冇乜歷史建設嘅城市,我從未試過感受到歷史離自己咁近。感覺就好似昨日塞車嘅內街、今日行過嘅柳樹旁都有過動人心魄嘅故事,處處都係從前王爺貝勒嘅府第,雍正爺可能就曾經喺身邊。依種感覺好特別,亦係一種只有歷史悠久嘅首都城市獨有嘅氣質同驕傲。

所以,「北京,我們會再來的!

沒有留言:

張貼留言