2018年10月26日 星期五

病榻隨想:《我老婆日日都扮死》觀後感





在床上病了好一段日子,腦袋內亂七八糟的一堆堆事情團團轉,然後慢慢就想起最近看過的這部日本電影:《我老婆日日扮死》。

取材自日本真人故事,當事人曾在yahoo網上留言,自己每天回家老婆都以各種形式死,到底要如何應付。於是,這出位的題材變成了網紅故事,不少漫畫、MV等二次創作應運而生,甚至有了今天的電影。

電影以夫婦關係為主線,丈夫見淳因為曾經和前妻離異,對目前的婚姻沒有信心。三年後,回家一刻驚見妻子千惠死在地上,驚惶失措。但原來老婆只是裝死,事後又若無其事地繼續煮飯。他滿腦子問號,妻子這裝死的玩笑卻越演越烈,每天的死法層出不窮。很多人猜想這件事背後的動機就是為二人增添新鮮感。然而,事實證明老公很快就為了妻子扮死而煩惱不堪,又何來新鮮感呢。有時候,即使再激烈的情節,久而久之也會變得令人煩厭,何況是平淡的三年呢?

故事的後段解釋了千惠的爸爸在年青喪妻後痛苦萬分,每天下班後帶著疲憊的身軀回家,千惠總是頑皮地躲起來要和爸爸捉迷藏。「每一天都很累,但仍然要找她。不過,每一次找到了,她的可愛的模樣令我忘了所有痛苦。」

就令我想起上班族下班這回事。一天下來,工作上的一切壓力佔據了心靈,下班後心情往往不能馬上抽離。對家的橫蠻、上司下屬的磨擦、緊張的時間表...... 一切一切惱人的鎖碎事,我們又何苦要帶著下班?不論對象是父親還是丈夫,千惠的頑皮搞作帶來的客觀事實是,她成功地把對方的心思帶回最重要的事情上。

話說回來,雖然這部電影的主題是死,但最令我印象深刻的一句話,是千惠與朋友由美子之間的對話。由美子在捧球練習場一邊揮棒一邊落淚。因為多年無法懷上孩子,出入醫院的各種檢查令她身心疲憊。千惠聽到後,無奈說不出一句安慰話。由美子卻搖頭笑說:「這樣很好。安慰的話有時候很傷人。」

可不是嗎?客套的安慰說話有時候省了更好。記得有一次讀一篇青年社工的訪問,他就提過,不要輕易勸別人要積極。不是每個人的處境都能隨時帶動正能量,胡亂安慰有時弄巧反拙。

不知這算不算是離題了因為影評提到劇本太多枝節,但我反而覺得導演是藉著如拼圖般的鋪排,從不同的細碎片段中解話。

千惠的父親說:「夫婦本來就是兩個不同的人。」他又說:「人生的旅程中,會遭遇三種道路,上坡道、下坡道,與『想不到』。」(上り坂、下り坂、まさか。)

在陪著千惠回鄉的夜晚,見淳看到妻子少女時代的讀本,而驚覺她口中的「月色真美」,原來是文學家夏目漱石喻意「我愛你」的意思。想反,由美子和丈夫佐野到訪,四人在偶然的對話中才知道原來由美子是鱷魚迷。丈夫其實對她一點也不了解,一廂情願以為送花送蛋糕便是相處之道。

的確,在還沒有認識你之前那個原來的她,又甚至是現在每天就在面前的她,又有幾人真正有空去理解?

最後的段落,二人來到琦玉縣的一個公園,當千惠正要把死的原因相告時,忽然吹來一陣大風,鏡頭就靜音了。雖說導演故意留下想象空間,但其實答案早已在電影中交代了。

夫妻本來就是完全不同的兩個人,同行之路高高低低,無法預測。當你迷惘時,也許覺得她難以捉摸。但只要你願意,定能在美麗的月色下找到答案。

有人說婚姻是愛情墳墓,這一部電影,卻讓人在墳墓的邊緣,尋回了愛情的初心。



2018年10月20日 星期六

【週末小旅行7】清新地2日1夜歸田園之旅

Link to 梨子總目錄

Link to 雅榆之隨筆

我們的遊記:

我們的成長

【墨西哥Cancun54夜古城之旅

【加拿大溫哥華】65夜老少咸宜之旅

【加拿大渥太華】43夜冬日之旅

【加拿大Niagara32夜瀑布之旅

【西九州自駕遊】福岡、天草、阿蘇87夜盛夏之旅 ()

【台灣西岸自駕遊】高雄至桃園77夜南北之旅 ()

【峴港自由行】43夜老吾老之旅

學海無涯之三】脫變

學海無涯之二45

釋懷

學海無涯之一不一樣的一年

驪歌~失落的紫荊花

讀後感【張純如: 無法遺忘歷史的女子】

【小學路之八】學海無涯

【小學路之七】最後的淨土

【四十歲人學單車記】Never too late

[More…]

[More…]




(2018.10) 身為一個既「適俗韻」又「愛丘山」嘅城市人,總希望適時可以遠離繁囂避世一下。每次見到一片青葱翠綠、聞到樹木青草味、聽到鳥蟬叫聲,我都會不自覺地興奮莫名。自從上次試過car camping後,今年決定進階 Glamping

好幾年前已經聽過「清新地」(Nature’s Harvest)依個地方,環境優美,以有機耕種為主題。以前未有營地,近期見佢哋引入咗蒙古包型式嘅帳幕,偌大舒適又親近大自然。但唔好以為話去就去,清新地辦嘅「半農半旅」活動,週末長期爆滿,最後我哋揾齊六個家庭「包場」週日晚,半年前預約定,終於成功落實日期,超期待呢!

可惜,颱風山竹令清新地遇上巨大破壞,入營前兩星期一度未能確定可否成行。好彩最後都可以如期入營,太好啦!非常感謝工作人員努力修復場地,真係唔容易。
1:45pm 西貢白沙灣碼頭集合。當日行程排得好緊密,心情好興奮!
上船了!船程10-15分鐘左右。
到達碼頭,職員哥哥先同小朋友解釋依個新加插嘅導賞景點,就係面前滿目瘡痍嘅垃圾堆。據說,以前從落船開始小路兩邊種滿怡人嘅綠色植物,但颱風不只將樹木吹斷,更加將海上嘅大量垃圾堆上岸。歸根究底,垃圾從哪裡來呢?颱風比我哋嘅反思,正正就係當人類為禍大自然環境,終有一日亦自嚐苦果。
一路步入農莊,見到幾部大型機車,相信都係因為颱風過後嘅修復工作仍未完成。樹木彎晒腰,以前嘅洗手間係兩間精緻小木屋,似乎成個頂已經比颱風吹走咗。
行入草地位置,大家心情充滿喜悅,果然一片草綠就係治療色糸。
一共有六個蒙古包,好壯觀又特別嘅場面。
我哋被分派到「一旅」。
每個營都有一個自成一角嘅小露台、簡單水盆及如廁設計。小廁所好乾淨,但只供小解,要辦大事就要行出去營外嘅洗手間。雖然麻煩啲,但咁樣可以保持營地清潔乾淨都唔錯。
蒙古包內有兩張雙人吹氣床墊,可瞓四個人,佈置清新舒適。每戶有一隻全新Teddy Bear可比小朋友帶走,個個開心到震。

美中不足嘅喺,全白色嘅蒙古包內開始發霉,視覺效果唔多美觀。我睇返年初時其他blogger嘅相,帳篷內仍然係白雪雪嘅,可見颱風及連場大雨嘅破壞力真係唔小,希望日後可以逐步清理。😢
大家安頓好,工作人員就開始解釋營內嘅用品、規矩、及活動流程。依位哥哥嘅介紹都好生鬼,令氣氛好輕鬆愉快。
第一件工作係執定啲枯枝枯葉🍂,準備一陣用嚟生火。
因為正式嘅田園導賞由四點開始,於是大家就到處hea吓,包括去吓其他人嘅營啦...
同羊羊玩吓啦... 🐑🐐
發現六旅上面有一個大平台,面對住好靚嘅瀑布。後來返屋企後查一查,依條瀑布果然有名堂,稱為「白水碗飛瀑」,係全港數一數二長嘅瀑布。
依度嘅環境好舒服,純粹行吓都已經係賞心樂事。
小朋友們就喺遊樂場放吓電先啦...
四點前,我哋又轉場到另一邊玩,有可愛嘅貓貓同羊羊相陪。
環境優美心曠神怡
咁靚嘅相唔係我影㗎,係一位大師級朋友嘅攝影技巧。所謂藝術嘅境界,就係相片本身就已經係一個故事:a picture is worth a thousand words...
導賞開始,職員哥哥先同我哋解釋咩係有機耕種:唔用化學殺蟲劑、唔用化學肥料、無基因改造...(嘩,我果然有聽書!)
每一旅人都會同時採摘一啲香草蔬菜放喺今晚嘅晚餐雞煲內,首先係香茅葉。兩父子大唔透,明明剪緊香茅見到草蜢又要玩吓,唔好整親隻蜢呀!
職員亦會介紹一下其他農作物,例如棚上未成熟嘅熱情果、我手上嘅田七、香薰常見佛手、仲有未係時候收割嘅菜心、白菜、紅蘿蔔﹑蕃薯等。
摘檸檬葉嘅同時,我哋欣賞一下樹上肥美嘅檸檬🍋。佢冇市面上賣嘅檸檬咁靚仔,葉上仲有蟲洞,證明100%有機。

放入雞煲嘅蔬菜,會隨住一年四季唔同嘅收成而改變,今期我哋採收嘅係粟米。🌽 我亦見過其他blog有人早幾個月收割紅蘿蔔、生菜、甘藍菜等。

原來,一棵粟米嘅結構非常細密。頂部嘅雄穗負責散播花粉,而粟米上嘅粟米鬚就係雌穗。每一條成功沾上花粉嘅穗絲,都連接住一粒成長出粟米嘅胚胎。平日大口大口享受甘甜粟米嘅城市人,又點會諗到每一粒粟米都得來不易呢?

不過,某一啲基因改造科技就會以蝎子基因注入粟米以抵抗蟲害。蟲蟲食咗會死,咁我哋呢?聽落都幾恐怖!😖
粟米葉就可以用嚟餵羊羊。
頭先冇摘檸檬,係因為我哋今日會用青檸。
最後就係薄荷葉同羅勒葉。
採摘完畢,終於步入依間咁美麗嘅小木屋,我哋圍埋一齊學煮雞煲同學生火。
雞煲好簡單,就係切曬所有材料放入個鍋度。
生火嘅意思,當然係唔用打火機啦... (盡量)!
攞齊所有材料,仲有叔叔為我哋做嘅新鮮手打烏冬,回營準備晚餐啦!
洗洗切切,交比小朋友做無難度。
如果係互相唔認識嘅家庭,大家通常會各自喺自己嘅露台用餐,但我哋係包場嘛,當然係搬埋枱櫈齊齊湊熱鬧啦。,透爐時間!嘩,六個爐排排坐都幾有氣勢!
時間一秒一秒地過去,法國叔叔先拔頭籌,成功透著咗個火爐!🔥 於是其他人開始可以借火,哈哈!😂
然後,大家都陸陸續續成功了!之後就係等食啦,煮熟隻雞要大約四十五分鐘㗎。好彩有位聰明媽咪居然帶埋魚蛋、芝士腸加料,大家食得不亦樂乎。依個時候,我哋開始後悔無帶酒精飲品... 萬事俱備,只欠酒樽!🍻🍾
食飽飽,休息一下,大家已經無乜戰鬥力,但今日嘅節目仲未完結㗎,根住落嚟係去返玻璃屋嗰邊準備做第二朝嘅早餐麵包。🍞🥖🥐
其實都好簡單,只係要預備麵粉團,等夜晚可以發酵。
小朋友搓到咁上下,最後都係媽咪們執手尾!
一邊行返帳幕嘅途中,我問身邊嘅小朋友,有冇聞到淡淡嘅羊糞味。味道唔強烈,只係好淡,但足夠令我諗起細個時候嘅鄉村味。我話:「有時候我都會懷念依種味道㗎!」佢好驚訝咁望住我:「吓?你鍾意依種味?」我笑。當年細個返鄉下時,大概就同面前嘅小妺妹差不多大。果然,味道係連結回憶嘅。
臨瞓前,爸爸帶咗哥哥出去沖涼。但因為要行10分鐘有啲遠,我同佬佬決定唔再出去,於是爸爸又好細心幫我哋透爐煲水抺身,果然學以致用喎!
瞓覺啦!開咗燈嘅蒙古包晚上構成一幅好美麗嘅畫面。


老實講,夜晚其實瞓得認真麻麻。因為係吹氣床墊,一轉身就好容易影響到身邊嘅人,反而小朋友就一覺瞓天光不知幾甜。弊啦,老公第二朝要返工,聽唔到佢打鼻鼾居然令我有壓力添!😅 不過,我諗camping本身嘅意義就唔係為咗瞓個靚覺嘅。第二朝,一醒就聽到清脆嘅雀仔叫聲,我真係好感動呀!
喺一片流水淙淙嘅小溪前擦牙,無疑係賞心樂事!
又嚟到早餐地方,係時候探一探尋晚發酵過嘅麵團。
叔叔教我哋做出唔同嘅趣怪形狀。正所謂有得玩有得食是也!
焗好啦!喺個咁舒適嘅地方食早餐,簡直浪漫到暈。
小朋友再把握機會玩多陣,然後就全部帶住bear bear返屋企啦。
經過垃圾堆,又係一陣唏噓。聽到叔叔一再重複「依度以前好靚㗎!」,真係完全體會到工作人員有幾心痛,同時真心希望有一日可以修復原貎。
上船啦!面向一片汪洋,係亂石磷峋嘅海岸,我忽然感覺依個地方真係充滿個性。

兩日一夜嘅「半農半旅」,對一個四人家庭嚟講,差不多係五星級酒店過一晚嘅價錢。但事實上係咪真係可以咁樣比較呢?我個人覺得係完全唔同而且好值回票價嘅體驗。住酒店,享受嘅係美侖美奐嘅硬件;glamping,享受嘅係接近大自然嘅同時,除去咗wild camping最辛苦嘅部份,令我哋一班嬌縱嘅城市人可以有限度地活動一下筋骨,加插少許採摘、簡單野炊,喺田野之中放鬆心情。

簡單地計一計,運作一個有機農場,打理多個營旅,其實成本都唔低。我相信經營者必然有一種對堅持宣揚有機耕種的信念,先會選擇做依回事。

另外,依兩日有一件好特別嘅事發生喺我身上。自從十月頭開始,我一度重感冒,病咗兩星期體溫上上落落都好唔返。就喺上船前,我仍然頭重重有小小背心冒汗。嚟咗清新地後,所有感冒嘅病徴神奇地離我而去。咳嗽、鼻水,無再出現...... 我完全感受到清新空氣嘅威力。

「清新地」,真不愧其名。清新嘅空氣、清新嘅環境、清新嘅體驗...