【曼谷自由行】4日3夜大昏迷之旅

Link to 梨子總目錄

本地遊記：	外地遊記：	小學路：	隨筆集：
【小兒科行山入門7】心經簡林與消失的昂平茶園 【週末小旅行7】清新地2日1夜歸田園之旅 【週末小旅行6】愉景灣2日1夜海天一色之旅 【小兒科行山入門6】河背水塘家樂徑 【週末小旅行5】沙田秋望2日1夜懷舊之旅 【週末小旅行4】黃金海岸2日1夜親子之旅 【週末郊遊8】T-Park [源·區]導賞遊 【週末小旅行3】澳門3日2夜自駕之旅	【西九州自駕遊】福岡、天草、阿蘇八日七夜盛夏之旅 (下) 【台灣西岸自駕遊】高雄至桃園7日7夜 (上) 【峴港自由行】4日3夜老吾老之旅 【曼谷自由行】3日2夜老夫老妻之旅 【不一樣的遊記1】加拿大東岸追憶之旅：滿地可篇 【東京近郊自駕遊】6日5夜河口湖、箱根親親富士山之旅 (上) 【沖繩自駕遊】7日6夜大滿足之旅 (下) 【名古屋自駕遊】愛知、岐阜、三重9日8夜仲夏之旅 (下)	【小學路之八】學海無涯 【小學路之七】最後的淨土 【小學路之六】世事無常 【小學路之五】因為平凡 所以很美 【小學路之四】二年級男孩:從Big Boy到Young Man 【小學路之三】愛的教育 【小一面試賽後感】催化剷之下犬媽急流言退	釋懷 病榻隨想：《我老婆日日都扮死》觀後感 消失中的詩韻 【四十歲人學單車記】Never too late！ 今天想吃咖哩飯... 消失中的味道 告別野村，重新上路
[More…]	[More…]	[More…]	[More…]

 

(2014.10) 上一次同老公兩個人外遊，已經係三年前。自從大仔四歲後，發現一家人旅行嘅天倫之樂，老實講又真係比二人世界吸引，所以成日都忍唔住帶埋囝囝。今年，我有少少覺悟。正所謂「孩子是過客」，為人父母都係一個成長過程，而且途中要學識唔可以過份依賴小朋友帶比自己嘅快樂。長話短說，總之就係兩個人試吓重拾年輕嘅感覺去旅行啦！

本來我想去好凍好凍嘅地方，例如哈爾濱、韓國、北海道之類…… 但只係試驗性三日兩夜，而且老夫老妻，太浪漫都係冇我份，所以決定去曼谷hea吓。

雖然長氣，順便又提一吓，帶慣小朋友去旅行嘅家長都會問我:「你點同個仔講？」的確，小朋友想去旅行係人之常情，知道冇自己份當然唔開心，依種心情係我未生仔前一直都唔明嘅。而實在我已經計劃咗大半年，中途老公好猶豫，曾經想帶埋囝囝。有一晚，我同個仔喺床到傾心事……

我:「Jobee，其實媽咪好唔開心……」
J:「點解呀？」
我:「本來爸爸會同媽咪兩個人去旅行嘅……」
J:「唔好……!」
我:「無啦，依家冇得去啦……」
J:「點解？」
我:「因為爸爸唔想囉…… 可能佢怕悶……」
J:「…… 咁、你係咪好想？」
我:「我梗係想啦！以前我哋成日都兩個人去，依家好多年都冇試過啦…… 可能爸爸唔想啦，所以我都幾唔開心……」
J:「都唔係嘅…… ，不如你再同佢再講吓啦……」

就係咁，囝囝開始勸我哋去旅行…… 而我亦明白到，上天賜比佢最大嘅禮物，係無任何特異功能，但有天真無邪嘅同憫心。

Day 1 - Marriott Sukumvit Park/ K Village/ Patara Fine Thai Cuisine

老夫老妻嘅一大特色係，你永遠知道對方下一步要做乜，簡稱為「默契」。例如: 執行李可以喺十五分鐘內搞掂，佢會帶備所有電子產品及充電，我會準備足夠紙巾同藥物；check-in後，老公會去China Mobile買張roaming卡(不過今次原來落地買平啲)，然後會去免費嘅Plaza Premium Lounge 食個快餐同攞一支水；最後，佢上機會開始打機或睇戲……

上機前指定動作。

到步後買roaming卡: 300Baht七日任用，好平！的士多都唔要，不過唔睇錶，一口價出市區450Baht。

Check point #1 – Marriott Executive Apartments Sukumvit Park

http://www.marriott.com/hotels/travel/bkksp-sukhumvit-park-bangkok-marriott-executive-apartments/

90 Sukhumvit Soi 24 Klongton, Klongtoey, Bangkok, 10110. Tel.: 66-2-3025555

比較冷門嘅酒店…… 點解揀佢？係因為我之前有少少天真的浪漫，想同老公玩吓煮飯仔！做過research，依間酒店少有地有fully equipped 嘅廚房，而且附近嘅Emporium有個大型超市！不過，面對Bangkok嘅美食誘惑，老公最後都係選擇食大廚手藝好啲！

Marriott Apartments嘅價性比一向唔錯。

廚房內用具好齊，煲碟餐具祙布一應俱全。

Check point #2 – K Village

http://www.kvillagebangkok.com

93,95 Sukhumvit 26, klongtoey, behind BigC Rama IV, Bangkok 101105

 
到步後想去醫肚，朋友介紹話附近嘅K Village有日本風味，因為google map話離酒店步行只需七分鐘，所以我哋決定試吓行。

距離其實係唔遠嘅，但要經過一條又窄又多車嘅橫街，有啲危險……「復行數十步，豁然開朗。」終於到啦！

K Village 係半户外嘅商場，有中、西、日、韓食肆。我哋到嘅時候兩點幾，好多賣嘢攤檔都未開。

揀咗間意大利菜，基本上樣樣都好食！

食飽後周圍行吓，買D左少少嘢。回程時，老公又發現原來酒店對面就有一間幾ok嘅平民spa center……

寫到依度，發生咗我寫blog以嚟從未發生過嘅事: 我居然有啲斷片……
返到酒店後，好似只係冲吓涼、睇吓電視，到底做咗乜嘢？居然唔多記得！於是，我唯有去問老公……
「瞓覺。」
「瞓覺？」
「係呀，我話不如瞓吓，你話唔好，但轉個頭你自己就瞓著咗！」

或者，咁就係真真正正叫hea咗啲時間。嚟曼谷之前嘅兩個星期，由於種種原因，我一直失眠。皮膚差人又殘，今日依種休息狀態，實在係我好耐冇試過嘅……

Check point #3 - Patara Fine Thai Cuisine

www.patarathailand.com

375 Soi Thonglor 19, Sukhumvit 55, Klongtonnua, Vadhana, Bangkok 10110. Tel. 66-2185 2960-1

依間餐廳係一個住Bangkok嘅同事介紹嘅，旅遊書上亦有提過，據說係食接近失傳嘅皇室風味泰菜。餐廳係由一間獨立屋改建，外有小花園。環境唔豪華，但幾舒服。

由獨立屋改建嘅餐廳

晚飯前於小花園留影。

食物都唔錯，個菜好味但好辣。

因為是日係老公生日，我同餐廳經理訂咗個小甜品比佢。但等咗好耐甜品都在製作中，佢竟然想cancel咗個order！明明都唔趕時間，依個人真係完全坐唔定，而且細心度零分，激死！

好彩，一再追問個經理後佢火速出咗個甜品，可能因為趕時間，個"Y"字寫到「咩咩」哋，哈哈！

晚飯後，我哋去咗酒店正正對面嘅一間Spa Center “Refresh@24”。其實今日下晏經過嘅時候老公已經研究一輪架啦，而依個輕鬆嘅飯後按摩亦為第一日畫上完美句號。

因為已經book咗第二日做按全身，所以今晚只係做腳底按摩。

Day 2 - Emporium/ The Oasis Spa / Asiatique/ Central World

「瞓覺瞓到自然醒，數錢數到手抽筋」係一位朋友以前經常提到嘅人生願望。雖然後者離我太遙遠，但今日總算感受到自然醒嘅威力: 跟咗我成個星期嘅眼圈忽然神奇地離我而去！

Check point #4 - The Emporium
622 Sukhumvit Road, Klongton, Klongtoey, Bangkok 10111

跟據我原本嘅計劃，尋晚本來想晚飯後去Emporium嘅大超市買餸，然後今日整個愛心午餐嘅。但一方面尋晚去咗做按摩而冇買食材，另一方面我有理由相信老公對我冇乜信心。十年冇落廚就梗係唔敢認大廚啦，於是我哋最終決定去附近嘅Emporium揾海南雞飯食。

依部專線篤篤，係往返酒店同Emporium嘅，都幾方便！

Food court唔算好大，但食物水準唔錯。

仲有其他小食，包括久違了嘅Krispy Kreme!

Emporium好多名店，我哋毫無興趣，所以走咗去睇精品。

仲有超級市場先係重點，而且老公又想揾辣椒醬，因為買辣椒醬可以話係佢嘅嗜好！(雖然買咗未必食！)

最後，我哋買咗一大堆手信比啲仔，包括冬蔭公味、生菜包味、肉醬意粉味百力滋，同埋林林總總嘅得意零食。回程好方便，call返酒店篤篤接送就得啦。

Check point #5 - The Oasis Spa

http://www.oasisspa.net/destination/bangkok/

64 Soi Swaddee, Sukhumvit 31, Wattana, Bangkok 10110

按摩，自然係喺Bangkok嘅重點行程。我見Oasis Spa嘅評語唔錯，而離酒店都算近，所以揀咗佢。Oasis Spa 其實有兩間，我本來book咗喺Sukumvit 51嗰間，但後來發現兩間嘅裝修好唔同，Sukumvit51好exotic，而Sukumvit31就走自然清雅路線，我就梗係鍾情後者啦。

優雅小白屋及荷花池，令人身心鬆弛。

換咗衫，影張相先！

經過咗兩小時嘅Thai Massage，我覺得喺Bangkok我唔會再去chain hotels入面嘅spa。有一啲舒適感覺，係豪華設計比唔到嘅。有時候，只有一種最簡單嘅清靜，先比到人最深層嘅放鬆。

Check point #6 - Asiatique the Riverfront

http://www.thaiasiatique.com/index.php/en

2194 Charoenkrung Road, Wat Prayakrai District, Bangkor Laem, Bangkok 10120

聽講Asiatique夜市已經唔新啦，但因為好耐冇嚟Bangkok，所以對我哋嚟講都係新。做完spa之後我哋叫咗的士直接過嚟，約20/25分鐘左右。 Asiatique好似話係全亞洲最大嘅夜市，以舊貨艙為主題，而且有瓦遮頭行得好舒服。

攤檔都放得好靚，乾淨又好行。

食市林立，餐廳同小食又多又吸引。

我哋最後揀咗食日本嘢，坐得好舒服而價錢亦合理。

又叫得太多，眼闊肚窄！

入夜，碼頭邊有歌舞表演。摩天輪睇落超快，我哋唔敢坐！

本來仲想行吓添，點知又唔覺意上咗部遊船！好儍呀！原來兩個人漫無目的，就會好大風險行錯路，上到船先諗起唔知為乜上船！

咁就唯有當睇夜景啦。因為百無聊賴，我又去咗Central World。原來，曼谷嘅週末晚到處都有人唱歌。從夜市開始，到Central World，室內室外，大大小小就有四個音樂表演。

由靚仔靚女到人妖唱歌都有。

依度嘅Gelato shop好靚，隻隻味都有水果裝飾！

最後，週六晚上，我哋喺商場嘅長凳上，食住美味嘅Gelato，聽住泰文歌，完結咗好耐都冇試過嘅二人世界之旅。

又一晚九個鐘頭睡眠，又一日自然醒……
朝早收拾細軟先發現成箱小朋友禮物，到臨走時喺喼底又見到我新買而冇著過嘅圍裙…… 始終用唔著，有少少可惜。今次嘅Bangkok之旅，我覺得係我自己，又或者係好多老夫老妻嘅寫照: 有時好想努力為對方做啲嘢，但原來又其實唔需要…… 因為有一種境界，冇特別安排、隨遇而安，只要一齊，就已經舒服、踏實、自在。

老夫老妻，就係佢講上半句，自己已經知道下半句，不過又識時唔插嘴，比佢講埋落去；
老夫老妻，就係你唔再需要保持完美狀態，因為最醜陋嘅地方都已經變成彼此窩心嘅笑話；
老夫老妻，係你唔會介意佢喺自己身邊打鼻鼾，因為deep down好想佢可以瞓得冧…… 當然，音量收細啲更好……

謹祝所有老夫老妻，睡眠充足、幸福美滿！