2018年1月5日 星期五

【週末小旅行3】黃金海岸2日1夜親子之旅



【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]



(2017.9) 轉眼間,哥哥就十歲啦!咁快就變雙位數,做媽咪嘅真係感觸良多。生日嘅週末,我比佢揀請好朋友嚟開生日會,定係一家人去一個香港小旅行,心入面偷偷希望佢仲係揀屋企多過揀朋友。果然,Jobee暫時都係好黐家嘅,佢諗來諗去都係話family重要啲,咁又比個藉口我安排去玩啦!

想有海灘resort feel,我喺愉景灣酒店同黃金海岸之間揀咗後者,因為佢嘅設施比較適合小朋友,而愉景灣酒店雖然靚,下年再大個啲去都ok(依家帶小朋友去旅行開始有啲倒數心情!😣

黃金海岸酒店有超得意嘅兒童主題房,但價錢好貴我覺得唔值,只係要咗普通房。房間全海景,可加床,裝修過好舒服。
雖然已經係九月,但週末check-in依然好多人。兩個阿仔就對部子彈𨋢極有興趣,睇極唔厭。
入房啦!房間比起我N年前入住時已經裝修過,都幾好吖。
全海景,好怡神!
急不及待先去游水啦,又可以搭子彈𨋢
酒店都幾有resort feel...
好好玩嘅兒童Waterpark
其實範圍好細,但玩水本身就係好好玩嘅事!
然後,游吓水先!


有啲地方佬佬唔到地,有啲驚,哥哥全程抱住佢,好恩愛!😂
其實我想過另一邊嘅大人池,但兩兄弟玩到唔願走。泳池有隻大鱷魚🐊比小朋友玩,但佬佬都係鍾意私伙嘅浮床多啲
玩到咁上下,決定先去沙灘。經過有電動車玩,但要排隊,所以我哋諗住遲啲再返嚟(點知後來已經冇電!)
酒店有一度閘直接通去黃金海岸沙灘,好方便。
見附近人少少,幾舒服,於是冇行去正灘嗰邊。
爸爸又例牌買燒賣魚蛋。
可能因為係人工沙灘,依度嘅沙幾幼,但水就一啲都唔清。
日落西山了,夕陽無限好......
 今晚,為咗似旅行,梗係要出吓門覓食,老公提議去屯門三聖灣食海鮮。
三聖灣嘅特色係買海產同酒樓係分開嘅,海鮮檔好多,魚缸好靚,琳琅滿目。
不過,搵酒樓就真係好有難度,大部份酒樓已滿座。
我哋買海鮮嘅檔主話幫手搵到室內位,但到咗食店其實都冇位,一手海鮮有啲狼狽。
後來唯有靠自己,終於搵到間中泰菜有露天位。
食物水準好一般,同埋大家都有的熱到呆咗......

教訓係,嚟三聖灣一定要預先book枱。不過話說回頭,另一次我哋再同屋企人嚟,訂好晒枱感覺都只係ok啦,但周圍人頭湧湧,下次應該唔會再嚟。

當晚,結果佬佬食唔飽,返到酒店再叫room service
咁又順便玩吓先瞓啦!
第二朝,兩隻儍豬瞓到咁都得?子彈𨋢依然係大愛,每次搭都超興𡚒
今朝有酒店早餐食,好嘢!
選擇唔算好多,但佬佬其實只需要麵包就已經滿足。
十二點check-out,足夠去playroom玩餐飽先走!
依度名為Adventure Zone,每個小朋友50分鐘收費$100。雖然我一向對遊戲室麻麻,但依度都算幾好玩,而且有幼兒區,又可以參加啲手作班。
兩個小魔怪放電,我哋乘機hea吓。
最後,離開前再玩埋壓軸嘅至愛家庭遊戲「hide & seek」、「一二三紅綠燈」及「狐狸先生幾多點」......
返房準備check-out啦,兩日一夜嘅哥哥生日之旅完滿結束。冇食大餐、冇切蛋糕,但開心愉快。


Check-out嘅時候,無獨有偶,大堂嘅live band正唱緊BeetlesHey Jude。依隻歌係喺內地歌唱節目「中國新歌聲」每次有歌手被淘汰要離開時嘅背景音樂,帶種淡淡嘅無奈。於是,Jobee用一種充滿住離愁嘅表情全神灌注咁企喺度聽歌。我本來有少少心軟,想話不如食個tea聽吓歌再走,但轉念之間反而覺得咁嘅時候走仲好

Take a sad song and make it better…”  

 天下無不散之筵席,有完結,先有新開始;有離愁,先會倍加珍惜。人生,莫過於此。



沒有留言:

張貼留言