2018年2月8日 星期四

【週末小旅行4】沙田秋望2日1夜懷舊之旅





(2017.12) 又到聖誕假!Yeah!今次又試玩兩日一夜小旅行,我揀咗住沙田,而聽到嘅每一個人反應幾乎都一樣:「吓?住沙田?」
冇錯。😊 
個人覺得沙田小旅行,絶無冷場。其實我根本未夠時間玩曬想去嘅景點,仲有以下嘅地方唯有下次再去

- 中文大學賽馬會氣候變化博物 (http://www.mocc.cuhk.edu.hk/en-gb/ )

Day 1 Check-in Shatin Hyatt > 酒店活動:環保小園丁 Little Eco Gardener > 單車🚴 > 龍華酒店晚飯
一路以嚟我都知道沙田凱悅酒店夏天有做Hyatt Camp嘅親子夏令營,但老實講如果夏天我又比較會選擇近沙灘嘅住宿。反而沙田附近有好多行山徑,好適合冬天活動。訊問酒店之後,發現兒童活動仍然可以分別預約,只係冇咗夏天嘅優惠。咁都好,就少少地約一個活動試玩吓。


又因為預約咗2:15pm嘅親子活動,酒店比我提早由三點改到兩點check-in,然後我登記咗做Hyatt member 後加床又免費。所以我近日比較少用中介網頁訂房,好多時價錢相約而同酒店真接訂安排會好好多。
一心打算嚟酒店食中午,所以十二點半左右就到了。即管問一下櫃枱,但未有得check-in
本來我想喺池邊食個Pool side lunch,但第一印象就認真麻麻。職員唔多樂意地比我哋坐,雖然佢話可以點室內餐廳嘅食物,但之後就冇咗影。可能係冬天,Pool Side Bar根本冇人埋,只得個snacks餐牌。
坐咗幾分鐘,爸爸開始上火,有上蓋嘅室外位又好大煙味,結果我哋都係搬返入室內坐。
終於有人埋,開開心心落咗單。
其實除咗個串啲嘅中年男職員外,餐廳服務都ok,有啲姨姨仲對小朋友好細心。我唯有提醒自己,旅行就係咁,一定有機會遇上態度差嘅人或者唔如意嘅事,最重要係唔好比其他人嘅負能量激親自已,否則好蝕㗎!
話説回頭,食物嘅質素好好,樣樣都好味,但又叫得太多。
 食完再次check-in,唔知點解櫃台冇免加床費用嘅記錄,我唯有返之前同訂房部門嘅電郵佢睇,過程好長。整體嚟講,沙田凱悅比我哋嘅第一印象唔多好。
不過,入房之後開始有少少改觀。
原來我哋被upgrade了,房間比想像中大好多。而且對住一片綠色嘅山景好舒服。
夠鐘去玩啦!今日我哋報咗名參加「環保小園丁」Little Eco Gardener
Fitness Center活動中心登記,職員帶住經過gym room落到地面。
基本上,「環保小園丁」就係用舊水樽做花盆再放一棵羅漢松落去。
職員會全程帶小朋友做,家長可以放心行開休息一下。我哋去咗辦停車場証返嚟,佢哋已經裝飾好水樽花盆準備種喇。
泥都幾實要比心機
回到室內再加泥淋水。完成!
咁又順便喺個小公園玩一下啦。
週圍行吓(依...?有人結婚!)
返房hea吓。
四點半再出動,因為我哋預約咗單車。
 其實,酒店嘅位置好好,可以租單車直接去科學園。但問題係我唔識踩,大家唯有就我。
附近有一條好適合初學者嘅單車徑。於是,我喺依度試咗一個鐘想學識踩單車。
條路有少少暗斜,Jobee開始愛上咗踩單車。見佢哋三個來來往往好舒爽,我就好似一隻龜一樣...
 一個鐘後,我坐住嘅肌肉已經酸痛到無法繼續,到底有咩辦法可以令我依副老骨頭學識踩單車!🤔

日落西山了,下一站係... 龍華酒店!

龍華食乳鴿係我嘅童年回憶,但依個回憶已經失落咗好耐,好奇怪地喺幾年前忽然冒起...... 大約五、六年前,有一次想食乳鴿,老牌店已所剩無幾,以前好喜歡嘅雍雅山房亦已結業,咁就不如試吓龍華啦!去到門口,見到一排排紅燈籠,咦?忽然回憶來襲,諗起我細個應該嚟過依個地方!然後好似做戲一樣,一串串片段湧上心頭...... 大手牽小手,拖住我嘅人,正係我嘅婆婆。佢同幾個auntie嚟食一人一隻全乳鴿,猶豫好唔好叫全隻比我,怕我食唔曬。但最後都係叫一隻比我自己食,我全隻食曬,佢哋仲大讚我好食得...... (一路寫,一路想喊,我已經冇機會講比喺天堂嘅婆婆聽我記得依個地方......

話說回來,五、六年前嘅龍華令人好失望,一啲都唔好食。今年睇到報導話龍華已經換咗廚司,改善咗以前乳鴿太乾嘅問題,咁就即管比多次機會佢啦。
經過一排排紅燈籠,懷舊嘅感覺出曬嚟。
仲有孔雀同小型遊樂場。
冇錯,就係我細個坐過嘅大廳。到今日我終於可以再試全乳鴿嘅感覺(雖然比咗隻肶佬佬)!燒乳鴿好好味,我個人覺得全隻上更juicy
豉油王同醉鴿都好味。雞粥同粟米魚片非常好,但菜胆雞真係唔得。
仲有人表演唱歌,好驚喜!
今晚能夠尋回童年回憶,百感交集。聽聞龍華之後將會由第三代接手,衷心希望依個咁有風味嘅地方可以保留落去。
https://hk.lifestyle.appledaily.com/lifestyle/realtime/article/20171010/57310690

晚飯後,為咗似旅行,我哋去咗行Aeon超市。Jobee仲順便剪個髮!😂
好放縱嘅晚上。

Day 2 > 沙田道風山
一覺瞓醒,要check-out 了。今次嘅房間咁舒服,有啲唔捨得走添!
本來有諗過食酒店早餐,但都係覺得唔抵食,而且尋日Open Rice揾到間台灣小食,佬佬好興奮想飲珍珠奶茶。
就係佢~九份十分
食物好唔錯喎!牛肉麵好味,甜品仲精彩!

終於飲到珍珠奶茶啦!
依個game幾好玩,鬥快計數!
下一個節目:行山。

我考慮過行大埔滘自然教育徑,但老公覺得冇乜特別嘢睇,而且冬天可能冇乜昆蟲。沙田道風山充滿靈氣,一直係我好想去嘅地方,所以揀咗後者。

道風山,係一個位於半山上嘅基督教園區,但同時帶有濃厚中國特色。1922年,挪威傳教士艾香德牧師(Karl Ludvig Reichelt)曾經喺南京創立「景風山」,後因戰亂於1930年遷移至香港,喺沙田創辧道風山基督教叢林,並邀得丹麥建築師艾術華(Johannes Prip-Moller) 幫忙,設計咗一系列嘅中國式建築群,主要希望吸引當時佛教或道教徒。

今日嘅道風山已經被列為二級歷史建築。除咗設計特別外,亦見證住當時西方傳教士為傳道而作出嘅努力,同時帶來一種文化共融嘅和諧氣氛。
見有網誌話從「沙田鄉士委員會」後小路上,但行行吓覺唔對路。原來行錯路,差啲上咗萬佛寺。
搵搵吓原來依個舊嘅鄉士委員會先啱!
旁邊樓梯上,開始上山。過咗「友愛村」,見到迴旋處轉右再上... 依度真係山嚟㗎,一路向上斜,都咪話唔辛苦。
幾時先到... 影吓啲靚相先啦。
到道風山道,見到石樓梯就係啦!記得要靜靜地同順手關返鐵閘呀。
一入門見到嘅係道風山嘅著名石陣:眀陣,目的係比信徒踱步禱告或默想。
(明陣:https://www.tfscc.org/page.php?t=1&id=77
以中式𥖁瓦畫成嘅畫,加上令人反思嘅聖經段落。
經過中式亭園,石群在冒煙,一股寧靜中的平衡。

藍天白雲下美麗嘅中式建築。
聖殿可以話係整個建築群中最吸引人嘅,好似天壇一樣嘅設計,室內有種好有靈氣嘅感覺,令我諗起細個小學時經常走入聖堂祈禱。
我哋坐咗一陣,冇人想離開,兩個小朋友唔知點解好自然攞起本聖經。
然後,開始去搵大十字架。經過一個小森林,兩個又玩樹枝唔願走。
咁就休息一吓啦
到十字架前,有一段小路,樹上有「明燈」,來到「生命門」。
「寛路行人多並無真樂,窄門進者少內有永生。」後來上網一查,原來為生命門提字的人竟是孫文,果然不同凡響。
好鍾意「感恩亭」。無論有否信仰,我覺得人必須學會感恩。雙手合十,問問自己,係先想到希望要如何如何,定係先感激自己所擁有的溫飽健康? 依度有好多畫將耶穌嘅聖經故事畫成中式背景。
三父子又發現蟲蟲🐛...
活在主內。
十字架... 雄偉壯麗。
艾香德牧師同丹麥設計司曾經希望擴建道風山,但因為中日戰爭爆發,計劃再無法實行。雖然如此,道風山帶住一種隱世嘅寧靜,仍然係一個好值得探訪嘅地方。
回程係落斜,感覺比較輕鬆少少,從半山望到沙田景色,我忽然想起細個背過一首余光中嘅詩,叫「沙田秋望」,而余光中先生正正喺兩星期前離開人世。

青山歷歷,近可染眉的如黛
青山隱隱,遠欲欺眼的如煙......

今次嘅沙田之旅,居然有少少發思古悠情,令我腦海充滿懷舊片段。道風山上,傳教士同孫文嘅夢想,隨住殘酷嘅戰爭及政治,未能喺佢哋有生之年實現。但前人無私嘅付出,終歸留低深遠嘅歷史價值,至少令小數人為之受惠。

擇善固執,憑良心走自己認為啱嘅路,窄門中總有知己。




沒有留言:

張貼留言