2019年2月22日 星期五

【小兒科行山入門7】心經簡林與消失的昂平茶園




昂平奇趣徑

難度:1
時間:約45分鐘
長度:約2.5公里

心經簡林,係一個我一直想去嘅地方。自從舊年去過饒宗頣文化館後,發現原來簡林內嘅心經出自饒宗頣先生手筆,就更為嚮往。

一喺唔去,今年內我居然就去咗兩次。第一次係秋高氣爽帶婆婆同小朋友,第二次係我同加拿大返嚟嘅朋友去。兩日嘅天氣極為不同,湮雨濛濛間簡林充滿超脫禪意;睛空萬里時木群大氣凛然。

從昂平市集步行到心經簡林只係十五分鐘路程,路段老少咸宜,順便可以搭昂平360。不過,我強烈建議平日去,週末遊人實在太多,等上纜車就已經等到天荒地老。

地鐵東涌站落,B出口,步行唔駛三分鐘就到達昂平360纜車站。
201810月與11月的分別:2分鐘與20分鐘嘅等候。同樣係平日,港珠澳大橋對東涌帶嚟嘅影響,不言而喻。

要坐水晶車嗎?婆婆本來有畏高疑惑,好猶豫,後來試過話原來並不可怕。如果覺得來回程有啲貴,亦可以考慮選擇單程水晶車感受吓。我個人就好喜歡,一方面排隊時候較短,另一方面二十分鐘車程有多啲風景睇。工作人員會安排幾組人坐同一部車,所以唔好以為可以獨佔車廂呀!

第一次我哋只係同一位外國人同坐,大家互相幫忙影相都幾開心。因為車廂人少,我們輪流瞓喺玻璃上面影!
第二次同老友小山嚟嘅時候人就好多人喇,無辦法影到玻璃地板,但勝在天朗氣清,可以遠觀大佛。
落車後先會到達昂平市集,可以到處行吓。依到亦有食肆同甜品店,但選擇唔多。昂平市集嘅盡頭係通往大佛嘅小廣場,有一排石像同好多牛牛,但要記住千祈唔好餵牛牛呀,唔好誤導咗佢哋養成亂食垃圾嘅壞習慣。
睇睇地圖,就係穿過市集去到盡頭再一直行...
路嘅右邊會經過通往大佛嘅樓梯,唔好上去,繼續往前行,留意路牌上指示,經過個紅頂涼亭就啱啦。
茶園餐廳已經唔存在啦,喺沿途經過依間被樹木寄居嘅石屋。
好似著名吳哥奇景一樣:歷史與大自然嘅微妙共生。
行咗兩次依條路都唔知道石屋嘅典故又點得呢?好奇嘅我當然唔甘心。上網一查,居然搵到一個令人感動又感概嘅故事。

Brook Antony Bernacchi(貝納祺),港英政府年代嘅一個傳奇人物。曾經係英國皇家海軍,亦被喻為英女皇御用大律師。1945年定居香港,為港人爭取興建公共房屋,同時亦係大律師公會主席,及一直連任超過三十年嘅市政局議員。

貝納祺家住大嶼山,深愛山野靈地,睇中當地高山霧濕,適合種茶,一手一腳將昂平打造成香港唯一生產本地茶的茶園。1960年代,茶園全盛時期曾經僱有四十幾人,包括由台灣請嚟嘅高山茶師夫,亦有由貝納祺安排喺茶園工作重過新生嘅釋囚、戒毒者等。四季收成不同茶葉,龍井、水仙、印度紅茶,以蓮花牌雲霧茶出售,甚至有海外買家越洋訂貨。

九十年代,貝納祺患病在英國離世,佢嘅骨灰就灑喺昂平茶園嘅草地上。所託園丁夫婦辛苦經營茶園及餐廳至六年前終於結業。今日見到嘅石屋,相信係當年茶園嘅其中一個建築物,現已人去樓空。

貝納祺係一個大善人,盡心幫助貧苦階層、學生、囚犯、戒毒者,亦大力協助發展大嶼山巴士,當年喺島上無人不識。今日,政府已經將茶園旁嘅「貝納祺小徑」改名為「昂平奇趣徑」,從前嘅大片茶園、老園主與居民曾經苦心建立嘅茶文化,喺歷史巨輪下漸漸灰飛煙㓕。

無盡感概......

好啦,都係繼續寫啦!

過咗荒廢石屋,好快就會見到「寶林禪寺」嘅牌,依個時候喺分叉路要揀右邊。
中途會再有一啲小徑,好快就會到「鳳凰觀山」依片草地。
而「心經簡林」就喺右邊喇!
木簡成一個8字型排列,象徵無限,生生不息嘅意思。如果有航拍機,效果應該會好靚。
依兩個小朋友頭先邊行邊拾咗兩枝樹枝,沿途就一路比武!😂
唔知係咪因為之前睇咗射鵰英雄傳,又打得似模似樣喎!再加上湮雨濛濛,有種華山論劍嘅超脫感覺諗唔到香港都有咁充滿禪意嘅地方。
又睇吓另一日藍天白雲之下,感覺完全唔一樣
一株株百年大樹,心經木雕顯得莊嚴脫俗。
高山木林間,心境會自然地慢落嚟。「心無罣礙故無有恐怖」,意思大概就係唔好自尋煩惱、作繭自縛,就無嘢好怕啦。
回頭我兩次都係原路走,十五分鐘就返回昂平市集。但原來其實可以行色依邊條路,經過青年旅舍,應該就喺頭先分叉路嘅左面接返原路。亦即係所謂嘅「昂平奇趣徑」,雖然我都係鍾意舊名「貝納祺小徑」貼地好多。
附近仲有其他行山徑,但鳳凰山難度有四星,應該要等小朋友大好多先得。如果下次再嚟,一定會諗起貝納祺,唔知可否再行入茶園餐廳揾返多少少茶園嘅縱跡,內心仍然不禁無奈。今日仲有幾個大嶼山人會記得佢?

真正愛一個地方,會為土地帶出生機,而唔係耗盡資源;真正愛護市民,會設法扶起基層提供上流性,而唔係趕絶低端。或者,貝納祺嘅離開、茶園嘅消失,香港人失去嘅唔單止係一個名字、一種味道,而更加係一代人嘅價值觀。



Reference:

香港倒後鏡

雲深不知處:昂平茶園

香港那些年:大嶼山絕種好人

沒有留言:

張貼留言