2016年4月10日 星期日

【坪洲一日遊】一次滿足四個願望






本地遊記連結:
兒科行山入門6河背水塘家樂徑
週末郊遊9東壩半日遊
其他遊記連結:
本地 | 親子遊 | 週末好去處 | 遊記 | blog | 行山 |

(2015.5) 春天快接近尾聲啦,要把握時間做啲outing,否則到大熱天就邊度都唔想去。今日出發前我哋各自都有自己心目中想去嘅地方,分別係:

爸爸 ~ 1)踩單車; 2)公園; 3)沙灘; 4) 坪洲
媽咪 ~ 1)坪洲; 2)公園; 3)踩單車; 4) 沙灘
哥哥 ~ 1)沙灘; 2)坪洲; 3)踩單車; 4)公園
佬佬 ~ 1)公園; 2)搭船船(即係坪洲啦!)

由於坪洲票數好高,就佢啦!但去到碼頭爸爸仲想縮沙,話不如改去南丫島,證明佢真係好擔心冇嘢做!好彩,坪洲並唔係爸爸心目中咁悶嘅……(

第一次搭船去坪洲,兩兄弟好興奮!
到步後,我第一時間影張大富翁真人版招牌相先!依個係我哋由哥哥五歲幾就開始玩嘅遊戲,因為佢好鍾意大富翁,所以我想帶佢去齊board game上啲地方。點玩吓停吓,話咁快已經過咗兩年……
22:坪洲
我哋發現碼頭邊停咗好多單車,我嘅眼球馬上被其中兩部family bike吸引住。依啲車都係私人嘅,但旁邊街坊話行入內街有得租,爸爸雙目即時發光!

經過政府大樓有圖書館,兩兄弟稍作停留,哥哥睇緊本Roald Dahl話走之前返嚟借。
再詢問單車店方向,有個菜攤姐姐話向滙豐行,見到對面「源記」,旁邊就係。我哋明明向住滙豐行,但忽然迷路,再問又回頭入咗街,原來依度都有另一間單車店。

family bike,但有二人車加小朋友車。我哋決定爸爸車我同細佬,哥哥自己踩。出發前,首先要先駛出好窄嘅橫街,但原來哥哥返而覺得好玩!

真係估唔到,一出到大街,就發現個小公園!
其實細佬話想去公園都係想「瀡」滑梯,依度冇乜人又幾新淨,好啱佢玩!唔知點解,市區嘅遊樂場已經好少有依種原始嘅鞦韆。

咁少見鞦韆,連爸爸媽咪都玩番夠本。
玩咗一陣,我哋再出發啦!經過一條長橋,有好多人釣魚,爸爸話後悔冇帶魚桿。不過就算唔釣魚,風景都好靚。
天朗氣清,涼風陣陣,好舒服!
再次出發,居然仲有另一個兒童遊樂場,但今次唔記得影相。後來,令哥哥最驚喜嘅係發現有沙灘(其實我同老公估到啦!),即時興奮到震~~ 因為驚冇沖身地方,我哋叫佢唔好除鞋。
哥哥熱愛沙灘
但細佬就驚驚!
哥哥好鍾意拾貝殼,仲似沙上寫咗"I love you dad and mom!" 而細佬見哥哥咁開心,開始受感染。
美麗嘅海邊。
哥哥拾到唔捨得走
一家四口。
玩到差唔多五點,想早啲食飯於是踩返單車去還車。沿途經過少許斜路,哥哥好鍾意,於是又踩多個圈先還車。

五點正,我哋行到著名嘅快車茶餐廳,點知原來五點半先開門。單車舖老闆都話冇book應該冇位,所以我轉到「坪洲冰室」。冰室老闆娘好忙但係好好人,見我哋咁肚餓,佢問:「好難搵嘢食呢?」

係呀!原來坪洲好多食肆都只係開好短時間,可能因為人少,外來客亦唔多。

茶餐廳水準套餐。炸雞翼仲有少少童年回憶味道,即刻當條街唔係淨得大家樂同美心嘅時候……




細佬佬忽然又扭計(因為扭得太多已經唔記得原因……),老闆娘即刻掏出一包「甘大支」tum佢,連廚房嘅廚師哥哥都面笑容望住佢。

再睇清楚,原來舖頭本身係五點半關門嘅,但老闆娘話:「慢慢食,唔駛急!」最後,我哋食到5:45分離開,諗住去圖書館借返哥哥鍾意嗰本書。點知,原來圖書館就真係唔等人,五點半已關門了

咁就慢慢行去海邊睇海啦……
看海......
平靜又美麗嘅海



 我以前同Jobee睇一本叫「小學生男生應做的50件事」,最令我印象深刻嘅,就係「看海」。對住大海,的確會令人思索澎湃,我希望有一日哥哥同細佬都體會到……

今日喺坪洲,我覺得搵到啲香港失落咗嘅嘢…… 就好似回到八十年代一樣,人與人之間有人情味,樓與樓之間有風景。空氣,可以盡情呼吸; 生活,可以放慢腳步。

沒有留言:

張貼留言