2016年10月22日 星期六

【週末郊遊2】長洲一日遊 : 戰勝張保仔洞






本地遊記連結:
兒科行山入門6河背水塘家樂徑
週末郊遊9東壩半日遊
其他遊記連結:
本地 | 親子遊 | 週末好去處 | 遊記 | blog | 行山 |




(2016.3) 復活節假期週末,約咗舅父入長洲玩。Jobee期待已久可以同佢嘅close buddy樂樂表哥一齊出去outing,好興奮呀!今次去長洲,其實已經講咗好耐啦,因為舅父一直話帶我哋去爬張保仔洞。

難得一齊搭船,就先去大會堂飲個茶先。自從有咗Food Guluapps之後,大會堂美心就變咗weekend出中環嘅可考慮之列。家已經好少有酒樓有手推車,所以一有機會就帶小朋友去感受吓,今日等位等咗15分鐘左右就有枱啦!不過,可能因為太肚餓,冇乜影相……
只係影咗至愛魷魚鬚。
醫好肚後,就去搭船啦!好彩上到快船40分鐘到步,復活節嘅長週末,原來今日長洲好多人呀!
佬佬有得搭船好開心呀
落船後我哋向右行,想揾租單車。舅父話佢之前有租過但上到斜路要泊埋一邊上唔到山嘅,不過爸爸係懶爸,唔想行路,所以都係問吓,但因為今日太旺,family bike已經冇晒啦!

於是,唯有還原基本步行路啦。行去張保仔洞約40分鐘,其實條路一路沿住海邊,係好好行嘅……
海邊留影……
兩位好爸爸都好錫小朋友喎
過咗西堤就去到家樂徑,開始轉上斜坡。沿途嘅樹木都幾靚。
舅父同婆婆…… 行動好一致。
再行十分鐘左右就到咗張保仔洞郊遊區依度可以picnic
遠離咗碼頭,人潮開始少了…… 我以為…… 但原來好戲在後頭!上到差不多洞口,開始見到人龍,好多人排隊等入洞!我忽然覺得嚟依個景點好似去咗廸士尼排玩遊戲一樣!

雖然根本唔知要等幾耐,但一場嚟到又唯有等,所以玩家嘅一手評語對我哋嚟講好重要。

「好無聊㗎,嘥晒啲時間!」有位肥仔哥哥出嚟話。

「好好玩,好值得去!」另一位叔叔話。

「你哋依個位起碼排半個鐘!」

「好快啫,前面去得好快……

排隊中,唯有影吓相啦。
等了又等,好彩舅母有帶零食!
等咗差不多45分鐘,終於去到洞前,勝利在望啦!
入洞前大家影張相先!
張保仔洞,傳說係著名海盜張保仔收藏寶物嘅山洞。其實後人認為洞內太狹窄(洞口長10呎,進出口間只有88),應該好難收藏寶物,而且並無痕跡。不過既然該洞已成為長洲名勝,近年亦已加設咗鋼梯,方便遊客進出洞穴,咁大家亦順利成章,就將佢當成玩大冒險嘅景點啦!
因為佬佬太細,應該冇辦法入洞爬上爬落,所以我同佢喺外面洞口等各人,順便selfie吓啦。
正望住嘅應該就係五行石,風景好靚呀!
等咗約10分鐘,首先爬出嚟嘅係舅父,然後樂樂表哥…… 嘩!好似都幾辛苦!

之後Jobee、婆婆、舅母都成功出洞,爸爸就殿後!原來,佢哋話洞內好黑,要用電筒或電話不停照住,仲要前面幫後面。頭先前面嘅姨姨同叔叔就好幫手,然後大家都照住後面嘅人,成件事好團結!
一出到嚟,Jobee就已經好興奮,大叫好玩!仲好想玩多次!
終於戰勝張保仔洞,離開時大家心情都仲好開心,等咁耐都值得嘅……

今日人就真係多咗啲,如果喺平日嚟長洲,張保仔洞係一個適合6-7歲以上小朋友同大人一齊玩嘅景點。Jobee就覺得好似冒險旅程一樣,而且畢竟係天然景點,比起主題公園特別好多


沒有留言:

張貼留言