【小兒科行山入門1】上窰民族文物館

Link to 梨子總目錄

本地遊記：	外地遊記：	小學路：	隨筆集：
【小兒科行山入門7】心經簡林與消失的昂平茶園 【週末小旅行7】清新地2日1夜歸田園之旅 【週末小旅行6】愉景灣2日1夜海天一色之旅 【小兒科行山入門6】河背水塘家樂徑 【週末小旅行5】沙田秋望2日1夜懷舊之旅 【週末小旅行4】黃金海岸2日1夜親子之旅 【週末郊遊8】T-Park [源·區]導賞遊 【週末小旅行3】澳門3日2夜自駕之旅	【西九州自駕遊】福岡、天草、阿蘇八日七夜盛夏之旅 (下) 【台灣西岸自駕遊】高雄至桃園7日7夜 (上) 【峴港自由行】4日3夜老吾老之旅 【曼谷自由行】3日2夜老夫老妻之旅 【不一樣的遊記1】加拿大東岸追憶之旅：滿地可篇 【東京近郊自駕遊】6日5夜河口湖、箱根親親富士山之旅 (上) 【沖繩自駕遊】7日6夜大滿足之旅 (下) 【名古屋自駕遊】愛知、岐阜、三重9日8夜仲夏之旅 (下)	【小學路之八】學海無涯 【小學路之七】最後的淨土 【小學路之六】世事無常 【小學路之五】因為平凡 所以很美 【小學路之四】二年級男孩:從Big Boy到Young Man 【小學路之三】愛的教育 【小一面試賽後感】催化剷之下犬媽急流言退	釋懷 病榻隨想：《我老婆日日都扮死》觀後感 消失中的詩韻 【四十歲人學單車記】Never too late！ 今天想吃咖哩飯... 消失中的味道 告別野村，重新上路
[More…]	[More…]	[More…]	[More…]

北潭涌自然教育徑
網站(交通及簡介):

http://www.heritagemuseum.gov.hk/zh_TW/web/hm/museums/sheungyiufolk.html
http://hiking.gov.hk/chi/trail_list/nature_Trail/PakTam_Chung_Nature_Trail/introduction.htm
難度: 無樓梯、無斜坡，適合一家老少
 時間: 以上窰民族文物館為終點的話，來回不到一小時
長度: 約一公里

(2016.5) 細佬佬仲未到四歲，第一次同兩兄弟叫做行山(其實都冇上山😂)，想揾啲BB班嘅入門山徑，研究咗之後決定小試牛刀，由北潭涌自然教育徑行入少少，去上窰民族文物館，貪佢1)車可到北潭涌; 2) 全平路; 3) 有湖景; 4) 去到文物館有嘢睇吓，亦可折返，可將行程控制喺一個鐘頭以下。

去北潭涌車站，可以從西貢出發坐車去到大網仔路嘅總站，自駕亦有停車場。

落車後有個小食亭，可以準備好行裝買返支水再出發。

經過西貢郊野公園遊客中心，向右行就啱喇！沿住大網仔路，途中有好多牛牛……

天朗氣清，好舒服呀！😄 唔到十分鐘，就會見到上窰村嘅路牌。

經過發記士多同一條小橋。風景都唔錯㗎！

開始進入山路啦！

沿途好多小動物，而且有紅樹林嘅灌木，就好容易搵到紅蟹仔。三父子駛唔駛咁投入呀……

特別嘅植物都有……

話咁快就開始接近上窰文物館啦，首先出場嘅係依個大窰。

上窰村，其實係一條建於19世紀末嘅黃姓客家村落，從事窰燒業務，燒造殼灰做灰泥或肥田料。八十年代初，上窰村被列為法定古蹟，復修後改為民俗文物館，開放比市民參觀。館內有房舍、更樓、豬舍、牛欄、等附設建築結構，展視當時大户居民嘅生活風貌。

經過灰窰，就到咗黃氏村屋，建喺一個高出嘅平台上。

雖然話算係大户，但其實就係一間屋幾間房舍，每一格嘅面積都唔大。

廚房、工作間、同養豬養雞嘅地方。冇冷氣，好熱，兩兄弟企晒喺風扇前…… 以前嘅人真係好熬得。

傳統大門同戶外平台。

我哋留咗一陣，就離開咗，因為見到對出有個小泊船位，風景好靚。

小小碼頭，好平靜好舒服嘅湖面，仲有位釣魚伯伯！

對面嘅建築物，後來睇返地圖，應該係保良局北潭涌渡假營，所以附近好多人划艇。

北潭涌，的確係城市中嘅綠洲……

我覺得依度好適合比浪漫嘅戀人談心，不過…… 我個極不浪漫嘅老公，當然係無興趣啦！我哋向前再行咗少少，不過感覺短途內無乜靚風景，又驚第一次行山如果太攰會嚇親兩兄弟，所以決定折返。

回程再欣賞一次上窰文物館，又經過一條小溪，都幾靚㗎！

佬佬比蚊咬咗一大塊，好可憐呀！自從依次經驗，我哋後來發現用Off嘅Deep Wood效果比較好。

喺其他blog見過一個人以山澗水嘅掟石仔位，應該就係依度啦。

雖然其實好細，但影起相嚟都幾好睇。

玩咗一陣，繼續行喇。話咁快又去到頭先經過嘅「復興橋」，再由原路行返去，全程唔駛一個鐘頭。

返到遊客中心旁邊嘅小食亭，食返枝雪條先！

今日嘅首次行山體驗都唔錯，佬佬全程冇投訴都幾叻仔，而且見到好多紅蟹同彈塗魚之類嘅小動物，兩兄弟都好興奮。下次再揾第二條BB班路徑啦！☺