2017年5月12日 星期五

【小兒科行山入門4】城門水塘之一:尋找童年白千層之旅





本地遊記連結:
兒科行山入門6河背水塘家樂徑
週末郊遊9東壩半日遊
其他遊記連結:
本地 | 親子遊 | 週末好去處 | 遊記 | blog | 行山 |



菠蘿霸自然教育徑
難度:1.5
時間:約1小時(圍繞城門水塘一週需時約4小時,菠蘿霸自然教育徑只是一部份)
長度:0.8公里

(2016.3) 對於城門水塘,我一直有一份莫名嘅親切感。主要係因為,六年級嘅時候,曾經同幾位小學摯友嚟過。當時我哋四個女仔,由其中兩人嘅父母帶住,就喺城門水塘近小巴站嘅地方燒嘢食。然後,其中一個朋友嘅爸爸帶我哋沿住城門水塘行山,經過一片廣闊嘅大樹林同草地,我咁大個女第一次見咁靚嘅景色,視之為世外桃園,驚為天人。因為覺得好似電視武俠片嘅背景,所以當時我哋為嗰個地方改咗個名,叫做「武林勝地」。

然後,有一日幾個女仔講起小時候,不如就帶埋小朋友再去回味吓武林勝地啦!於是,我哋帶住3-9歲嘅四位小朋友又重返城門水塘喇!
是日星期日,城門水塘都幾多人,綠色長方形就係今日行嘅位置。
小巴站附近依個小食亭算好多嘢食,餐牌好豐富。
本來冇諗住食咁多,點知老公話睇住老闆娘煮好碗好靚仔嘅餐蛋公仔麵,但原來煮多咗居然冇人要,所以佢就要咗喇!
既然係咁大家都食個麵拮拮魚蛋先
開始啦!由長樓梯上。咁多人嘅?唔洗驚,人龍係等緊小巴嘅。
上完長樓梯,會見到引水道,然後就開始行了...... 依條路冇鋪過,感覺幾原始,而且水塘景色開始喺身邊出現...... 經過「賞蝶園」,我哋等陣再返嚟picnic
經過幾個「郊遊地點」,仲居然有一棵紅葉添!
嘩,要上好多樓梯!Jobee一路行一路話:「依度唔適合婆婆...
上到盡頭係另一條鋪得好靚仔嘅柏油路,好多馬騮仔!
終到咗依個加卡位,兩邊大樹杉天的確好有詩意。
等咗好耐先等到冇人影到張靚相
再影返張合照先
再行多少少,就到咗著名嘅「白千層」。可能因為星期日,人都幾多。
略略解釋一下白千層樹啦。上網查一查,原來白千層樹嘅樹葉可提煉出白樹油,即係著名嘅白花油同萬金油成份。之所以叫白千層,係因為此樹即使生咗新樹皮後老樹皮仍然會留喺樹桿上作為保護層。市區種有難度,因為其根部突起會破壞行人路,而且汽車廢氣容易染黑樹皮。所以要欣賞白千層,城門水塘不愧為最佳景點。如果到咗夏天水漲時期,更有機會睇到傳說中著名嘅「水浸白千層」美景。
我哋去嘅時候係三月,見唔到水浸,反而見到大量白千層嘅根部。
成功避開人潮影到幾張靚相。
仲可以落到水塘邊……
小朋友開始開心石仔。
玩咗一陣,我哋想搵地方野餐,邊度有草地呢?仍然搵唔到武林勝地,又怕小朋友唔行得太遠,所以我哋決定折返去「賞蝶園」。
行返轉頭都要20-30分鐘。
而且上賞蝶園要行條長樓梯。
依度好舒服喎!雖然見唔到蝴蝶但好適合野餐......
好豐富呀!小朋友食得好開心!
跑跑、跳跳、玩玩...... 我最鍾愛同大自然玩遊戲嘅小朋友!

依個時候,忽然有一班不速之客入侵!城門水塘同金山一帶,出名多馬騮,頭先可以慢慢享受咗咁耐野餐,都算好彩㗎啦!
忽然有幾隻馬騮跳出嚟,大家嚇到雞飛狗走,然後佢哋乘機極速搶食,搶咗啲水果同蛋糕,然後爬上樹唔洗兩分鐘清晒!熹熹見自己想食嘅蛋糕比馬騮食到無曬,即時好傷心咁喊咗出嚟...... 😭
被搶食後,兩位爸爸收拾殘局。
之後我哋唯有走人啦,我仲幫馬騮影相添!

一路行返轉頭,小朋友們話好討厭馬騮仔。然後我哋解釋,其實野生馬騮都只係肚餓,本能地見食物就搶......

就係咁,今日就結束咗城門水塘之旅...... 對我嚟講,今次只係第一部份,因為我仲未搵到記憶中嘅武林勝地。兩個月後再同另一位小學同學講起依件事,原來城市水塘嘅一個大圈,無論向邊個方向行武林勝地都應該要行到差唔多最遠嘅中間點,即係距離白千層仲要再行一段長路(原來我哋幾個女仔細個嗰時都幾好腳骨力!),下次繼續努力啦!

沒有留言:

張貼留言