2017年12月14日 星期四

【小兒科行山入門5】柏架山道自然徑~大潭水塘~陽明山莊




柏架山道自然徑

交通及簡介:
難度:2
時間:約三小時
長度:9公里

2017.4)又約媽咪團行山,五個小朋友,想有小小嘢玩吓,研究一番,決定試吓行柏架山,主要係從天后開始上柏架山道,可以參觀「紅屋」,即係「林邊生物多樣性自然教育中心」。不過原來條路一啲都唔短,今次可謂越級挑戰!
五大五小,由紅屋行到陽明山莊!
同朋友相約喺鰂魚涌街市,因為好多網站介紹依度係柏架山道自然徑嘅入囗。
但原來的士可以駛到紅屋入囗!早知道就可以省去15分鐘嘅長命斜路。
「林邊生物多樣性自然教育中心」,以前係太古糖廠高級職員的住所,現已被列為二級歷史建築。
展館內唔係好大,有少量嘅林邊生物,但感覺有啲可憐......
之後,我哋參加咗DIY製作班,整蛇仔。其實展覽同DIY班都冇乜特別,反而紅屋嘅古典設計我好鍾意。
 玩完紅屋,開始正式行啦!不過,其實都只係行一小段路搵地方picnic
經過「鰂魚涌樹林研習徑」,依段路其實都好特別,可以經過英軍曾經為凖備與日軍作戰而建嘅爐灶,不過今日條路已經夠長,唔行啦。
行咗一小段路後,我哋停咗喺燒烤場附近picnic。好豐富呀!行到一身汗,好彩Auntie B 好醒目地準備咗凍比佢哋飲。
享受完豐富午餐,依度可以去個洗手間再上路,而且由涼亭望落去風景都幾靚㗎。
唔知點解,小朋友們同Jobee一齊就會開始睇蟲蟲 🐛,臨走前Jobee又揾到隻小草蜢。

再上路了!小朋友心情都好興奮喎!
再到高啲嘅位置都仲有觀景涼亭。
行咗冇一個鐘都有大半個鐘,終於到咗依個靚景打卡位。對面山頂嘅圓波波建築,據說係民航處喺2004年啟用嘅航道監察雷達,覆蓋範圍由香港國際機場伸展至256海哩之外㗎。
居高臨下,休息一下先!
又上路了,其實今日班小朋友真係好叻,行咁多路都冇投訴。依兩個小朋友就以拾樹枝為樂!
行到身水身汗,終於去到依個大涼亭位。依度有幾條分叉路,包括右邊依條聽聞可以上到頭先見到嘅波波雷達站。
我哋已經冇腳骨力啦...... 一於繼續向另一面嘅水塘進發。
又有蟲蟲睇?
去咗一段幾陰涼嘅地段,忽然舒服咗好多。
哈哈,Jobee今日做咗大哥哥 😆
終於見到水塘啦,超感動!辛苦得嚟嘅,自然特別靚!
上水塘大壩到此一遊,小朋友合照一張先。
唔好以為咁就行完,行咗三份二左右啦。依家繼續落下水塘。原來依度叫做「大潭水務文物徑」。
小朋友開始叫辛苦啦,而且唔夠水飲。行依條路記得要帶備足夠嘅水
但總有心情睇蟲蟲!😂
見到依個涼亭,勝利在望了!依度就係大潭家樂徑嘅入口即係我哋出口
不過...... 其實未完㗎,要行到陽明山莊先有車走。😅
佬佬同身邊嘅女仔話:「依度係馬路嚟㗎,你要拖住我。」 態度超認真!
「陽明山莊」,一路以嚟我只知道佢好靚仔,但從來未有過今日對佢嘅渴望 ......
冰凍嘅雪糕,甜美嘅完結。
離開陽明山莊時已經差唔多六點,今日誤打誤撞地行咗咁耐以嚟最長嘅一段行山徑。有山有水、有景有蟲,我覺得都好值得,而且更欣慰嘅,一直都唔知原來小朋友可以咁行得。不過,中途折返,唔行得都唔得㗎啦!😂 其實,長大咗好多時都係一樣,有啲路前途未明,但有信心冇行錯,就只可以比心機行落去。

加油啊,小朋友!  Im so proud of you!




沒有留言:

張貼留言