2016年10月8日 星期六

【銀鑛灣週末遊】兩日一夜休閒之旅

Link to 梨子總目錄

本地遊記:

外地遊記:

小學路

隨筆

【小兒科行山入門7】心經簡林與消失的昂平茶園

【週末小旅行7】清新地21夜歸田園之旅

週末小旅行6愉景灣21夜海天一色之旅

【小兒科行山入門6】河背水塘家樂徑

【週末小旅行5沙田秋望21懷舊之旅

【週末小旅行4】黃金海岸21親子之旅

【週末郊遊8T-Park [·]導賞遊

週末小旅行3澳門32夜自駕之旅

【西九州自駕遊】福岡、天草、阿蘇八日七夜盛夏之旅 ()

【台灣西岸自駕遊】高雄至桃園77 ()

【峴港自由行】43夜老吾老之旅

曼谷自由行32老夫老妻之旅

【不一樣的遊記1】加拿大東岸追憶之旅:滿地可篇

東京近郊自駕遊65夜河湖、箱根親親富士山之旅 ()

【沖繩自駕遊】76夜大滿足之旅 ()

【名古屋自駕遊】愛知、岐阜、三重98仲夏之旅 ()

【小學路之八】學海無涯

【小學路之七】最後的淨土

小學路之六】世事無常

【小學路之五因為平凡 所以很美

小學路之四二年級男孩:Big BoyYoung Man

小學路之三愛的教育

【小一面試賽後感催化剷之下犬媽急流言退

釋懷

病榻隨想:《我老婆日日扮死》觀後感

消失中的詩韻

【四十歲人學單車記】Never too late

今天想吃咖哩飯...

消失中的味道

告別野村,重新上路

[More…]

[More…]

[More…]

[More…]





(2016.9) 想揾陽光海灘、想遠離繁囂、想放慢步伐…… 本地遊,兩日一夜,都未嘗不可。梅窩嘅銀鑛灣酒店,十幾年前同老公拍拖過,記憶中兩個人一部單車,沿住海邊涼風習習,好舒服嘅一段回憶。所以,今年決定帶兩隻小魔怪再試吓。Checkcheck,原來銀鑛灣酒店嘅房間都有裝修過,仲好啦!雖然並唔豪華,但企企理理,收貨!
上船前拮串魚蛋先!不過中環去梅窩碼頭嘅魚蛋燒賣真係唔多好食,強烈希望店主比啲誠意!
望海的男孩。
趕到快船,話咁快四十分鐘就到啦!
到步後我哋先喺碼頭旁邊租咗部「家庭單車」,$200一日,即時變咗有車階級好掂呀!
但係,可能爸爸踩得太快,忽然甩咗鏈…… 好彩佢整返好。點解爸爸成日都好似乜都識整嘅呢?
其實我哋踩過龍,應該喺未到新樓盤旁嘅阿信屋之前就轉右入海邊嘅路,再行唔洗一分鐘就會見到銀鑛灣酒店。
好多單車都泊喺酒店前依條路,於是我哋都係一樣。
酒店正門係餐廳,要從右邊走入lobby,經過一個小側門,另一棟係北翼。
Lobby其實好細,一入去嗰刻有好多人check-in,嚇我一嚇。好彩,人潮好快就散咗。梅窩嘅酒店選擇唔多,相信好多嚟渡週末嘅人都會選擇銀鑛灣酒店。

之前我上網睇過啲blog,數量唔多,多數家庭都係住南翼海景房。雖然北翼都好似話裝飾過,但冇一手相睇,有圖有真相,我最後都係喺Agoda訂咗海景房。加埋床,約千五一晚,以佢嘅配套嚟講其實都唔平。但實在地位取勝,又係location, location, location… 
長話短說,入房啦!職員見我哋有小朋友,比咗一樓我哋,兩兄弟準備睇房好興奮!
房間唔大,但乾淨整潔。茶色玻璃外就係無敵海景!
不過,依度嘅房間有一個小問題,就係洗手間有一股怪味。我哋研究過,所有浴室設施都好乾淨,唔係酒店管理嘅問題,味道係由外面嘅渠滲入。而後來我哋亦進一步證實,無論梅窩街上嘅明渠、或餐廳洗手間,都有同一種味道,應該係成個區域嘅渠道排水做得唔好。依啲時候,我就會諗,可否唔要高鐵、唔要大白象……

不過,「爸爸一定有辦法」,佢居然用濕毛巾包住咗洗手間嘅渠口,異味即時大減。老公嘅杰作,我居然忘記影相!

入正題!係時候向沙灘出發喇!銀鑛灣酒店,Silvermine Bay Resort… 都勉強可以係resort嘅,因為佢同沙灘嘅距離係…… 唔洗一分鐘!
久違了的銀鑛灣海灘。
山邊有一條小溪,有溪水一直流向大海,於是,我哋經過時佬佬話係「小馬過河」(一本童話故事)
喺依條小溪同大海嘅鹹淡水交界,有好多小魚、小蟹、寄居蟹……,亦都係沙灘最熱鬧嘅地段。
今次可謂佬佬嘅大突破,佢由本來好驚沙,到後來主動話:「我唔驚沙灘啦!我宜家鍾意沙灘啦!」
有一位內地大叔好利害,眼明手快捉咗好多魚仔,仲送咗兩條比我哋,好好人!而我哋自己就捉親都係寄居蟹……
其實,喺我印象中嘅銀鑛灣,沙比較滑,所以我一直向另一面行,果然,後面有人玩沙灘排球嘅周圍啲沙舒服好多。
不過,有小生命嘅水溪太吸引啦,佢哋三隻小朋友唔願移位…… 仲有姨姨掘到好多蜆!
風箏,係爸爸嘅大愛,經常會出現喺我哋嘅家庭照中出現。
雖然成功放到幾高,但之後都係跌落嚟。此謂,曾經高飛……
Sand castle時間開始!佬佬開始鍾意「畢」水,哥哥就不停執貝殼,於是我忙碌砌沙堡……
一家四口合力嘅製成品。
再行出海邊睇浪,望住平靜嘅大海,比一切奢華享受更無價……
回頭看到的是極清澈的溪水正流向大海
Jobee唔願走,好想親手捉條魚仔,爸爸一路幫佢,不過太難啦……

於是我同佬佬就selfie等佢哋……
最後,捉唔到魚,居然見到Jobee喺沙上寫咗字,好感動……

返酒店涼個靚涼後,例牌床上玩餐飽!

但我同老公已經肚餓到震,左揾右揾後,決定去碼頭附近嘅大排檔。外面寫華記,坐落先見坐咗喺順興,揾一揾原來openrice評語好唔錯㗎!
嘩、嘩、嘩…… 停不了地叫咗好多。因為我哋敏感,個蒸虾只係Jobee食到,但佢真係食晒成碟!順興果然名不虛傳,碟碟都好味!👍👍👍
晚飯後又返到海邊周圍行吓,原來夜晚有好多牛出晒嚟海灘,極其壯觀,只係太黑影唔到相……
今晚佬佬攰啦,好早就瞓著咗。但爸爸同Jobee過一陣又要去麥當奴買嘢食,於是兩個大小魔鬼最後都係令我食完宵夜先瞓。

第二日起身,見到嘅係…… 海。(不過如果唔係茶色玻璃會好啲……)
酒店嘅早餐時間,人都唔少,但食物種類就好少,好多自助熱盆都係重復嘅……
簡單地嚟講就係三個字: 無誠意。除左白麵包同腸仔攰強係正常味道外,所有食物都唔多新鮮。火腿酸酸地、breakfast bun又硬又乾、連炒蛋都有啲怪味…… 不過,好彩小朋友食白麵包都開心嘅……
食咗一餐唔係太飽嘅早餐,我哋先check-out酒店,將行裝放酒店櫃檯。因為,我哋正準備去依次行程嘅另一個重點部份: 銀鑛灣瀑布。
攞返部車先!今次爸爸話叫Jobee試吓載我哋,哥哥好man呀!不過,之後都係比返爸爸踩……
離開酒店向左走,就有路可以一直上山揾瀑布。另外,山上亦曾經真係有個銀鑛洞㗎,所以依度先叫做銀鑛灣。

梅窩嘅銀礦洞原來已經有成百年歷史,係1862年被發現嘅。其實本來係一個鉛礦,但由於大部份鉛礦嘅礦石都含有少量嘅銀,於是吸引咗唔少人到梅窩鉛礦採銀。18世紀依度曾經有大規模採鑿工程,但1890年後漸漸因為銀礦質素欠佳而停產。現時銀礦洞已經被政府封閉,入唔到。我哋上山嘅時候沿路都有啲橫額要求政府重開銀礦洞。
沿途經過一啲小村落。
如果踩單人單車嘅話可以直接去到銀礦洞同瀑布。我哋係家庭車,所以去到一半就上唔到啦,要行路。
不過其實條路都好好行,而且好多小動物,兩兄弟行吓又停吓。
依度有名堂㗎!叫做「百年古樹」同埋「南園冰室遺址」。
但其實我只係喺早餐張枱墊上見過依兩個點,之後上網又揾唔到資料。到底冰室同古樹有咩歷史背景都始終係個迷。如果政府可以楝個牌解釋吓就真係造福人群。
沿途風景優美。
見到好多可愛植物……
巨型蜘蛛…… 真係多不勝數,原來同我哋上次喺大帽山扶輪公園見到嘅一樣,Jobee話叫Golden Orb Weaver,或者Banana spider(佢係我家嘅動物及昆蟲專家)
白芒至梅窩嘅山徑由08年北京奧運開始改名為「奥運徑」,我個人唔明白深意,覺得有啲九唔搭八。起個牌寫中國運動員名單,唔知同銀礦灣有咩關係,可能放奧運地鐵站仲啱啲……
經過咗一段路,遇上了不下十隻八隻巨型蜘蛛,我哋決定上網查一查。原來,Jobee真係無錯,依種真係叫Golden Orb Weaver,係有毒嘅,而且出名喺銀礦灣一帶特別多!
搵到Golden Orb Weaver嘅資料,先知道原來今日竟然「深入蛛穴」!
再往上行,終於到達銀礦洞口啦!
依度比我想像中靚,而且風景怡人!
洞已經封咗,可惜。沿途都有居民橫額希望重開銀礦洞,如果可以至少加固及重開一部份,令市民可以一睹百年礦洞嘅風采,就實在太好啦!
銀礦洞向下行唔到五分鐘就見到銀礦瀑布。
因為前兩日都落雨,今日瀑布水源充足,本來應該好靚好壯觀。但係……
美中不足係有一位姨姨好唔客氣咁喺瀑布中心上演一幕「美人」出浴,非常之大殺風景。是日星期日,人都唔少。大家都有啲掃興,好多人都係睇兩睇張相就走人,但佢同另外兩位為佢影相貌似行山友,好耐都唔走!

旁若無人瀑布姨姨同貌似行山龍友。結論係,如果無咗「美人出浴,其實銀礦灣瀑布的確幾靚,絕對值得一去。

回程嘅路上都有小插曲。話說行過嚟嘅時候經過一條好窄嘅小橋,橋邊手把同上面嘅樹枝之間有一個超巨蜘蛛網,上面仲有一隻今日見過最大嘅Golden Orb Weaver。因為樹蔭下都幾暗,爸爸經過嘅時初時見唔到,差啲碰到隻蜘蛛,好危險呀!

本來我哋以為依段路無人會經過,但頭先見原來都幾多人從白芒行山過嚟,爸爸怕再有下一個受害者,於是決定要打斷個網。

經過小橋,大家都顫顫驚驚,同毒蜘蛛超近距離接觸。
然後,爸爸用乾樹枝打斷蜘蛛網。第一次唔中、第一次斷咗一半、第三次先成功!
JobeeGolden Orb Weaver嘅蜘蛛網喺陽光下會呈金黄色,比一般蜘蛛網堅韌三倍。蜘蛛呀蜘蛛,破壞咗你嘅家園真係對唔住啦,希望你轉過頭搵過下一個靚位再織過個黄金網啦!

過咗小橋,我哋好快就返到頭先停單車嘅位置。
出到沙灘,喺士多買咗啲飲品。坐低休息吓。嘩,原來依邊先係正灘,有燒烤場,而且有好舒服嘅坐位。
佬佬坐低食雪條。而哥哥見到沙咁幼,好想玩,但我哋話無時間再濕身啦……
後來,爸爸再去士多,然後Jobee細細聲喺我耳邊好興奮話:「媽咪!我見到爸爸收埋咗個shovel喺背脊……
哈哈!果然,廿四孝爸爸買咗個鏟比佢玩沙,Jobee立即奔到海邊左掘右掘,掘咗啲怪果出嚟佬佬就一直面不改容嘆雪條
於是,我就望住細沙上嘅Jobee,喺微涼嘅海風下飲完咗一罐美味嘅冰凍椰青水。好享受依一刻…… 其實,簡簡單單留喺香港,都可以好舒服。

等到十二點,其實,我哋等詳呢?

就係等外藉同事介紹嘅依間China Beach Club開門。好細嘅一間家庭式餐廳,當時冇諗過即將落唔嘅係一段非常不愉快嘅經歷。
餐廳內只有約五、六張枱,全室外。因為全部枱其實都好迫,內側嘅位要半爬入去,有一位貌似女主人嘅外藉女仕比咗張六人枱我哋,問我哋可否2:30前還枱。

當然可以啦,因為我哋正打算趕1:20分船。然後,我哋都未坐好,另一位貌似賓賓嘅女待應叫我哋換去另一張更迫嘅四人枱。明白係外藉女人比我哋坐後,佢表示我哋必須兩點前還枱。Ok…… 依間嘢真係寸金尺土,以為個位鑲鑽咩,我真係咁得閒都去海灘坐啦!

然後,佢居然迫我哋立即叫嘢飲!於是,我哋叫咗啲汽水、fruit punch之類…… 點知,佢仲係企喺度,又要求我哋即刻叫嘢食。連餐牌都未有時間睇,只係立咗兩頁,第一頁係BBQ肉類、第二頁有啲地中海口味(Moussaka, pita)。記得英藉同事只係話依度係食western嘢,而地下嘅黑板就寫住rib eye, lamb chop之類,我哋覺得大概係賣大路嘅international菜式,所以老公好自然咁問咗一句: "Do you have any burgers?"

女待應居然一下白眼,極度卑視地回答:"Burgers? No! We are not a Chinese restaurant!"

因為佢太冇禮貌太串,我哋真係一時反應唔到,只係話,"But burger is not a Chinese dish!?"

冇道歉,而且依然串爆回答,"Well, i don't know! Maybe Chinese like burgers!"

見到佢嘅嘴臉,我實在認唔住啦,所以強硬地回答," It's not about whether burger is a Chinese dish, it's your attitude."

她有啲啞口無言,只係話,"Oh… alright."

其實,都幾明顯佢根本覺得我幾個中國人又唔識食又阻住佢張枱,所以我哋決定離開。經過門口酒吧,我哋將剛才發生嘅事講比貌似老闆娘聽,不過佢亦不以為然,只係淡淡然話,"Ok… burger is American!"

Totally missed the point!

如果咁唔想比張枱人,未唔好比囉!
如果咁睇唔起中國人,未唔好嚟香港囉!

白白浪費晒啲時間,經過酒店我哋喺櫃台攞返個大袋,再直接去到碼頭還咗部單車。今次我同老公極有默契,二話不說直奔「中國熊」China Bear。其實尋晚都諗過食,不過因為太多人。China BearOpenrice梅窩嘅第一位食肆,第二位就係尋晚食咗嘅順興。估唔到最終食晒頭兩位,而且兩間都好得!

同係西餐廳(待應都唔識講中文),但China Bear坐得好舒服而且服務非常好。
知道我哋趕船,啲食物出得好快,而且好好味!
估唔到,我哋終於真係食咗個"American burger"!因為時間關係,最後打包咗兩件pizza,櫃檯職員臨走仲叫住我,比個doggy bag…… 雖然之前本來心情唔多好,但最後大家都帶住滿足嘅肚皮同愉快嘅心情完結咗梅窩之旅。

上船啦!
今次,我哋全家人都好鍾意依個小小weekend trip,亦令我決定要多留意留喺香港嘅短途旅遊選擇。離開嗰日係94日立法會投票日,所以我哋都早啲走預留足夠時間去投票。

從船上望住海景同一個個美麗嘅小島,其實香港不乏水清沙幼嘅海灘,但發展旅遊業就只著重購物,少有考慮離島多建酒店或交通配套,每逢節日好多香港人(包括自己)都會考慮外遊。

我忽然想起區家麟嘅一篇文章話瑞士嘅人口同人均收入都同香港差唔多,但香港低下階層就好難分享到經濟成果。

「香港,不是不好,只是本來可以更好。」

6 則留言:

  1. 請問樓主在週末晚上,酒店及沙灘旁的公眾燒烤爐是否有位可使用呢?

    回覆刪除
    回覆
    1. Hi Jennifer, 我們住的是九月第一個週六晚上,經過沙灘旁有見到有人使用公眾燒烤爐,但人不算多,仍有很多位置。

      刪除
  2. 作者已經移除這則留言。

    回覆刪除
  3. China Bear行前啲有間叫The Kitchen,十分好食,推薦!如果你地會再去可以試下^_^
    我每次去都會食

    回覆刪除
    回覆
    1. Hello Sy1226,非常多謝推介,下次一定試試!😋

      刪除