【海迎灣週末遊】2日1夜冇得開車但有得住嘅Car Camping初體驗

Link to 梨子總目錄

本地遊記：	外地遊記：	小學路：	隨筆集：
【小兒科行山入門7】心經簡林與消失的昂平茶園 【週末小旅行7】清新地2日1夜歸田園之旅 【週末小旅行6】愉景灣2日1夜海天一色之旅 【小兒科行山入門6】河背水塘家樂徑 【週末小旅行5】沙田秋望2日1夜懷舊之旅 【週末小旅行4】黃金海岸2日1夜親子之旅 【週末郊遊8】T-Park [源·區]導賞遊 【週末小旅行3】澳門3日2夜自駕之旅	【西九州自駕遊】福岡、天草、阿蘇八日七夜盛夏之旅 (下) 【台灣西岸自駕遊】高雄至桃園7日7夜 (上) 【峴港自由行】4日3夜老吾老之旅 【曼谷自由行】3日2夜老夫老妻之旅 【不一樣的遊記1】加拿大東岸追憶之旅：滿地可篇 【東京近郊自駕遊】6日5夜河口湖、箱根親親富士山之旅 (上) 【沖繩自駕遊】7日6夜大滿足之旅 (下) 【名古屋自駕遊】愛知、岐阜、三重9日8夜仲夏之旅 (下)	【小學路之八】學海無涯 【小學路之七】最後的淨土 【小學路之六】世事無常 【小學路之五】因為平凡 所以很美 【小學路之四】二年級男孩:從Big Boy到Young Man 【小學路之三】愛的教育 【小一面試賽後感】催化剷之下犬媽急流言退	釋懷 病榻隨想：《我老婆日日都扮死》觀後感 消失中的詩韻 【四十歲人學單車記】Never too late！ 今天想吃咖哩飯... 消失中的味道 告別野村，重新上路
[More…]	[More…]	[More…]	[More…]

(2017.4) 上年已經發現香港有可租住露營車過夜嘅營地，本來十一月訂咗塘福露營車，點知大病一場去唔成... 😭 好傷心！然後，塘福露營車已閉門維修，暫時冇得再book了。不過，依個時候，我又見到長沙海迎灣Welcome Beach 嘅廣告，營地又新又靚，於是立即訂了四月初依個唔凍唔熱嘅時候。

Wild camping係我一直好想做嘅事，但係自己一方面無經驗；另一方面亦無可否認全家人都嬌生慣養，所以都係小試牛刀，從住露營車開始。

Car camping嘅其中一個重點就係煮嘢食，所以我哋首先去咗東薈城嘅Taste買餸。

是日星期日，商場外嘅藍的排晒長龍。原來大嶼山只有75部的士，一到假日就一的難求，反而平日司機就相對清閒。

等咗一陣車，終於上到車啦。由東涌到海迎灣車程約20分鐘，到步時剛好係3:30 check-in時間。

海迎灣嘅大門幾靚㗎！入面環境都好舒適，一路行入去，搵我哋住嘅3號車。

要比$100入會費，另外$1500訂金。我哋今日訂嘅係豪華四人車，聽講同普通四人車嘅分別係有獨立企缸，盛惠$1800一晚，假日更貴，其實已經係酒店房嘅價錢了！

入面都幾舒服喎！車內車外都好亁淨，大家好滿意。

旁邊有得玩搖床，可能仲係4月初，有蚊但唔算多。

草地可以踼波，兩兄弟開心到不得了。

仲可以玩童車。又可以慢慢hea...

依度閘門，係通往沙灘嘅。

今日天氣好好，晴空萬里，但唔太熱又有海風。

可惜冇買沙灘玩具。因為怕大多嘢拎，依家就後悔了，Jobee唯有掏手玩沙。本來以為長沙海灘好旺，原來要行十分鐘左右先到旺點，下次可考慮行沙灘過去食嘢。

爸爸又放風箏，今日好好風，佬佬好興奮！

冇沙灘玩具，唯有同兩兄弟執吓貝殼啦，都幾靚吖，而且啲沙又細又舒服！

玩咗一陣，佢哋想返去踢波，於是離開沙灘了。木欄旁邊有得沖水洗腳，好方便！

又係踢波時間，我就乘機喺吊床休息吓先！

好快又到了今日嘅重頭節目：A4紙箱雞。

我喺網上睇咗好多介紹，今日決定要試吓，仲特別帶咗芭蕉電風扇幫個箱通風。過程好簡單，用鍚紙包好個紙箱，篤啲㝫窿，放啲燒紅咗嘅炭，再㩒埋紙箱焗熟隻雞。

首先醃好隻雞後（一包李錦記醃料份量就perfect喇），用燒烤义固定，我哋仲多手放咗隻洋蔥入去。老公放咗3-4嚿炭，我又叫佢放多兩嚿，點知就出事了......

滿枱食物，超期待！

隻雞焗落，我哋開始各忙各嘅嘢，爸爸入咗camper van煮罐頭湯，我燒腸仔比佬佬食，Jobee切定士多啤梨一陣整smore。

忽然之間，我見到A4紙箱不斷冒煙，正大叫老公，已見火舌燒咗出嚟！Oh no... 😱 好彩老公同工作人員馬上滅火！

被清理嘅紙箱同燒燶咗半邊嘅雞。

今次紙箱雞行動雖然失敗，但我決心下次要再試。可能因為太心急，放六嚿炭太多了，下次可減半，而且要久唔久開蓋換邊，如果我哋早五分鐘開蓋，應該可以冇事。

於是，老公將隻雞去皮手撕，然後炒咗一碟teriyaki chicken出嚟，非常美味！😋 今晚嘅晚餐仍然係好得，有湯有沙律、肉食半燒烤半煮，仲用棉花糖朱古力整咗strawberry smore。

你又燒、我又燒......

四人以上嘅露營車煮食爐係喺車入面嘅，反而二人車嘅爐頭喺室外，有人直接就喺室外打邊爐，好有風味！

食飽飽了，好滿足！而入夜後嘅營地依然燈火通明。

返入露營車後，大家輪住沖個涼。花灑嘅水壓係就係麻麻，水好細，而且難控制冷熱。不過，我又覺得camping嘅目的本身就在於要習慣用最少嘅supply嚟享受生活，依部車完全已經係過份豪華。

沖完涼好舒服，然後將餐枱變身做睡床。

玩啤牌時間！

可能因為頭先喺沙灘曬過吓個人好攰，我好快就睡魔急call，反而爸爸仲煮宵夜chicken noodle soup同兩隻小魔怪喺室外飲。寧靜嘅夜晚享受三個男人的浪漫，哈哈！

不過，最慘係返入車之後車門個鎖壞咗，開唔到門，令爸爸關唔到出面嘅大門，只係關到度網門，今晚爸爸一個人瞓餐枱位嘅床好凍呢！然後，度門第二朝又自動好返，真奇怪！

第二朝，一覺醒來我就聽到雀仔唱歌，好感動！

兩兄弟一起身又踢波，不亦樂乎！

我同老公就喺車內嘅小廚房夾手夾腳煮早餐。本來揾工作人員開定個蓬準備開餐，但因為太陽太曬了，都係要轉移陣地。

「食早餐啦！」我從車上向草地叫。然後兩兄弟收波、洗手、幫手攞嘢，依個情況我覺得好溫馨......

最後，我哋決定喺室外嘅小涼亭食，又涼爽又舒服。今日早餐好豐富呀！］

依兩日嘅食物份量都控制得唔錯，冇乜嘥嘢。

食完早餐，我哋去另一個涼亭hea吓...

差不多check-out了，小朋友好依依不捨...

因為call的士等的士需時，又再玩吓添啦！

好relax嘅星期一早上，出面見到有人滑浪。

要say bye bye 啦，下次再嚟啦！

後記：Check-out前搵來搵去搵唔到個電視機遙控器，唯有話比工作人員知，喺按金扣咗$150。離開後半個鐘頭左右，海迎灘嘅職員call返我，話喺棉被內搵到咗，所以會退返錢比我哋，太好了！

今次第一次嘅car camping體驗基本上好滿意。Jobee好想再去，但我比較傾向一步步邁向真正嘅wild camping。不過，一切就順其自然啦！