2017年4月9日 星期日

【小兒科行山入門3】新娘潭自然教育徑





新娘潭自然教育
難度:(1.5) 雨後要小心滑石
時間:約1小時
長度:約0.7公里

(2016.12) 一到十二月,同事之間就會問,放假去唔去旅行?然後我多數都會話,唔會啦......  係呀!因為十二月嘅香港天氣太好了,要把握機會outing 吓!
又係另一個好天嘅週末,又想試吓行山。今日同婆婆一齊出發,試點係近西貢北潭涌嘅「新娘潭自然教育徑」。
先講講新娘潭嘅由來,根據「遠足·香港」網,「相傳在很久以前,有位新娘出嫁,坐著花轎,經過附近山路的時候,遇上山洪暴發,花轎跌進瀑布底的潭中,新娘慘遭溺斃。後人為悼念這位不幸的新娘,便把事發的瀑布,命名為新娘潭。」原來依度曾經發生過咁不幸嘅事...... 😔
因為新娘潭自然教育徑係一個大圈,如果揸車嘅話非常方便,泊車喺門口就可以行入去,對面馬路就有洗手間同水機。
地圖路線 ~ 我哋由紅色箭咀依個位置開始,但其實另一邊藍色箭咀入都得,出口可以係入口,入口可以係出口。
嘩,一入嚟就幾靚啦!
開始行喇!
條路上完一段就一直向下落,但石面都幾滑,要小心行......
步步為營,個個拖實小心行,有部份石路就幾「冼」,有啲石面仲有青苔。
久唔久回頭望吓......
有少少特別嘅植物。
落到咁上下,見到好靚嘅小橋流水......
啲水嘅顔色層次分明,好似明信片景一樣!
依度亦係新娘潭同照鏡潭嘅分叉路,要唔要繼續上呢?婆婆話仲ok喎!
咁就上啦!
都值得嘅...... 因為個照鏡潭瀑布好靚!
沿路落返去就會見到燒烤爐同野餐場地。
咁就攞啲零食出嚟食吓啦!
另一個角度嘅小橋流水。
一樣咁靚!
回程啦!今次要向上行,不過係樓梯,冇石頭咁滑。
搵到咩蟲蟲呢?
又經過啲燒烤爐,由另一個門口出返嚟
沿路邊行一段路返停車場。
佬佬見到咩呢?原來地上有一隻受咗傷嘅蝴蝶,為咗怕比人踩到,我地將佢移到入面嘅草地上。
最後,路口有洗手間,重可以喺水機買支飲品先走。全個行程一個鐘左右,可野餐、可燒烤,有靚景!

「祝君旅途愉快!」


沒有留言:

張貼留言