2017年9月29日 星期五

【週末郊遊6】塔門一日遊:傳說中嘅草原牛牛







【四十歲人學單車記】Never too late

今天想吃咖哩飯...

消失中的味道

告別野村,重新上路

坐月子讓我明白:我是媽媽的公主

[More…]





(2017.4) 塔門,又名Grass Island...... 一直比我「風吹草地見牛羊」嘅感覺,係一個我聽咗好耐但從來未去過嘅神秘外島。但凡係去北潭涌入面嘅地方,都有啲難度,今次決心試吓,仲同靚媽老友一家一齊探島

上網查一查,主要有兩個辦法:
1)從馬料水搭船~ 可坐港鐵到大學站(步行15分鐘或的士到馬料水碼頭),但入塔門嘅船程要一個半鐘左右;
2)由西貢或北潭涌轉車往黃石碼頭,再搭船入塔門,船程約半小時。
其實兩條路都好轉折,因為唔想船程太耐,所以揀咗第二個方法。
點知,早上十點到北潭涌,已經完全冇車位...... 兜咗15分鐘,爸爸先放低我哋去小食亭。
哈哈!人就係唔可以食得太放縱嘅,因為魚蛋、燒賣太好食,到爸爸泊好車我哋已經忘記咗要等巴士...... 結果,自然係錯過了!咁唯有坐綠的入黃石碼頭啦。

到喇!要等等船先......
依兩位由三歲就認識嘅小朋友,已經由以前嘅糖黐豆變成今日嘅怕羞羞......
大船未到,有小艇問我哋搭唔搭,但又話唔夠人唔開船喎......
結果都係等到大船到。右邊係上船後回望黃石碼頭
都坐得幾舒服幾好風㗎,影張大合照先!

到高流灣,有少少人落船。依度仲冷門過塔門,可能真係一日一、兩班船,平日就係孤島一個,令我忽然諗起小說嘅桃花島......

終於到步了!好嘢,可以醫肚!
一落船就比依間「弓字邊」吸引住,所以話location 幾重要!

 三大四小,叫咗四人餐加泥猛粥。聽講塔門係炸墨魚丸同泥猛粥出名嘅。
...... 都幾好味,尤其泥猛粥Jobee一試難忘!咦,點解唔記得影椒鹽鮮魷嘅?

食飽飽,開始行喇!首先由小村落出發,經過天后廟。
從天后廟右側嘅樓梯直上,經過小路,就會上到大草地。
終於到了!著名嘅大草地,已經見到有風箏飛緊,心情興奮!
遼闊嘅草原天地,好舒服!
崖邊浪人們......
哥哥一貫地完全唔怕動物,二話不說就摸落隻牛牛到!
依兩個由細玩到大但又好日唔玩一次嘅小朋友,奇怪地每次見面都玩得好夾。
依隻風箏係之前喺西安買返嚟嘅,可能上次喺南生圍已經放到殘殘地,今日好似廢咗武功一樣飛唔起......
喺草地玩咗一陣,我哋決定繼續上路。塔門島上嘅路都似新鋪嘅一樣,好行又靚仔
到咗另一邊,坐住涼亭望住個海,好愜意!
點解地上總有寶尋?
唔好以為可以喺依度picnic,因為牛牛好唔客氣,會侵佔你嘅食物。
靚媽老友一向心口有個勇字,決定帶啲細路落岩石群!海邊嘅景色又真係好靚嘅......
佬佬驚驚...... 正好比個藉口我陪佢!
當時,我仲未知道原來塔門石群係有名堂嘅,其中有:1)呂字疊石、2)塔門洞、3)龍頸筋 http://www.tapmun.hk/br.htm
又繼續行,今次由另一邊走,經過海邊。
 當中都有段小插曲。Jobee好唔開心,佢一直想走回頭路。事後返到屋企先知原來佢喺大草地某處埋咗啲「寶物」!又唔早啲講......
不過,人要行新路,先有新發現嘅,睇吓個海幾靚!
影張合照啦小朋友!Jobee呢?企唔到幾秒又去咗睇蟲蟲啦!
全程約一個鐘,終於行到村口,可以買枝飲品。
未夠鐘上船,食個豆腐花先......
但之後又miss咗隻大船,今次坐小艇喇(好似係廿蚊位)!返到黃石碼頭再等巴士走人。

四月份嘅塔門,雖然草地未變成綠油油,但天氣一流,海風吹住感覺心曠神怡。塔門比我想像中更多牛牛,野生動物要自行覓食,打風落雨更要搵避難所。不過,比起衣食無憂但終日為奴嘅家畜,相信我仍然會選擇自由。

見到牛牛、見到草坪上嘅露營客,嗰種天空海闊天地為家嘅豪邁,不禁令人心生羡慕。

其實今日只係行咗塔門嘅一日細圈下次有機會再探索一下北島啦



沒有留言:

張貼留言